आईसीटी समाचार
रेडियन्ट कलेज, बुटवलले काठमाडौं विश्वविद्यालय स्कुल अफ एजुकेशन अन्तर्गतको बीटेक एजुकेशन (आईटी) २०२५ ब्याचका नयाँ विद्यार्थीहरूको लागि ओरियन्टेशन तथा स्वागत कार्यक्रम सम्पन्न गरेको छ।
कार्यक्रममा सहभागी विद्यार्थीहरूलाई कलेजको संस्कृति, शैक्षिक अवसर, नीतिहरू तथा आगामी शैक्षिक यात्रासम्बन्धी विस्तृत जानकारी प्रदान गरिएको थियो।
कार्यक्रममा काठमाडौँ विश्वविद्यालय स्कुल अफ एजुकेशनका डिन प्रा. बालचन्द्र लुइटेल र म्यानेजर शिवनाथ मैनाली विशेष अतिथिका रूपमा सहभागी भएका थिए। उनीहरूले नयाँ विद्यार्थीहरूलाई सम्बोधन गर्दै नवप्रवर्तन, अनुशासन र रूपान्तरणकारी शिक्षाको महत्वबारे मार्गदर्शन प्रदान गरे।
यससँगै रेडियन्ट कलेजले भारतबाट आएका छ जना अन्तर्राष्ट्रिय अतिथिहरूलाई स्वागत गर्दै अन्तर्राष्ट्रिय सहकार्य र शैक्षिक आदान–प्रदानको नयाँ सम्भावन हुन सक्ने देखाएको छ। कार्यक्रममा कलेजले गत वर्षका प्रमुख उपलब्धिहरू पनि प्रस्तुत गरेको थियो।
पढाइसँगै व्यावहारिक सीपलाई समान प्राथमिकता दिँदै रेडियन्ट कलेजले पहिलो वर्षदेखि नै विभिन्न आईटी कम्पनीहरूसँग सहकार्य गर्दै इन्टर्नसिप, प्रशिक्षण तथा रोजगारीका अवसर उपलब्ध गराउँदै आएको छ।
