मंगलबार, ९ कार्तिक, २०७८
Tuesday, 26 October, 2021

फेसबुक चलाउँदै गर्दा केदारनाथले पत्ता लगाए बग, पाए सवा लाख पुरस्कार 

पोखराका युवा केदारनाथ पौडेलले फेसबुक म्यासेन्जरको सुरक्षाकमजोरी (बग) पत्ता लगाएर १ हजार ७० अमेरिकी डलर पुरस्कार प्राप्त गरेका छन् । बग पत्ता लगाएवापत पौडेललाई फेसबुकले १ हजार ७० अमेरिकी डलर अर्थात १ लाख २४ हजार रूपैयाँ दिएको हो । 

म्यासेन्जर ग्रुपमा आफ्नो साथीसँग च्याट गर्दा यदी उसको निक नेम परिवर्तन गरेमा त्यसको जानकारी थर्ड पार्टीलाई जाने बग पत्ता लगाएको पौडेलले बताए । 

‘ग्रुपमा आफ्नो साथिसँग च्याट गर्दै हुनुहुन्छ भने र उसको निक नेम तुरून्तै परिवर्तन गर्नुभयो भने त्यसको नोटिफिकेसन थर्ड पार्टिलाई जान्थ्यो,’ उनले आइसिटी समाचारसँग भने, ‘जो व्यक्तिसँग च्याट गरिरहेको छ उसलाई जानुपर्ने नोटिफिकेसन उसलाई पनि जान्थ्यो । सँगसँगै अर्कोले पनि म्यासेज पठाइरहेको छ भने उसलाई पनि नोटिफिकेसन जान्थ्यो ।’

उनले करिब ३ महिना अगाडि यो बग रिपोर्ट गरेका थिए । बग पत्ता लगाएवापत फेसबुकले उनलाई १ हजार डलर रिवार्ड दिएको थियो । त्यसमा लामो समयसम्म सहयोग गरेको भनेर फेसबुकले थप ५० डलर दिएको थियो । त्यस्तै बग क्राउड अकाउन्टमा आएपछि थप २० डलर पाएको उनले बताए । यसरी सबै गरेर १ हजार ७० डलर रिवार्ड पाएको उनी बताउँछन् । 

बग पत्ता लगाउन कुनै पनि प्रोग्रामिङ ल्याङवेज जानेको वा आईटी पढेको नै हुनुपर्छ भन्ने नभएको उनको भनाइ छ । उनले भने, ‘म पनि सामान्य एउटा प्रयोगकर्ता मात्रै हो । मैले कुनै प्रोग्रामिङ ल्याङ्वेज सिकेर वा आइटी पढेर बग पत्तालगाएको होइन् ।’

 

सम्बन्धित समाचार