आईसीटी समाचार
आर्टिफिशियल इन्टेलिजेन्स अब यति अगाडि बढिसकेको छ कि यसले मरेका मानिसहरूको आवाज, कुरा र सम्झनाहरू पनि फेरि जीवित बनाइदिन सक्छ।
केही कम्पनीहरू यस्ता एआई च्याटबोटहरू बनाउन लागेका छन्, जसबाट मानिसहरूले आफ्ना बितेका प्रियजनहरूको डिजिटल भर्जन तयार गरी उनीहरू जस्तै अनुभव पाउन सक्छन्।
यो प्रविधिलाई अहिले 'डिजिटल आफ्टरलाइफ' वा 'डेथबोट्स' भनिँदैछ।
डेथबोट्स के हुन्?
डेथबोट्स त्यस्ता एआई प्रणालीहरू हुन् जसले कुनै व्यक्तिको बोल्ने शैली, आवाज र व्यक्तित्वलाई पुनर्निर्माण गर्न सक्छन्। यी सिस्टमहरूले मानिसको आवाजको रेकर्डिंग, टेक्स्ट मेसेज, इमेल र सोसल मिडिया पोष्टहरूबाट डाटा सङ्कलन गरी एउटा यस्तो डिजिटल अवतार तयार गर्दछन् जसले मरेपछि पनि बोल्न सक्छ। पहिले यस्ता कुरा कल्पनाजस्तै लाग्थे, तर अहिले एआईले यसलाई वास्तविकतामा परिवर्तन गर्न सुरु गरेको छ।
वैज्ञानिकहरूले गरेको प्रयोगहरूबाट मिश्रित अनुभव प्राप्त भएको छ। केही सिस्टमहरूले केवल तपाईंका स्मृतिहरू: जस्तै बाल्यकालका कथाहरू, पारिवारिक कुरा वा सल्लाहहरू व्यवस्थित गरी राख्छन्।
एआईले ती व्यवस्थित गरी एउटा डिजिटल डायरी वा आर्काइभ बनाइदिन्छ, जुन तपाईं पछि हेर्न वा सुन्न सक्नुहुन्छ। तर केही सिस्टमहरूले त्यो सीमालाई पार गरी कुनै बितेको व्यक्तिको डाटाबाट च्याटबोट बनाउँछन् जसले सोही तरिका र आवाजमा तपाईंसित कुरा गर्छ। समयसँगै यी च्याटबोटहरू मेसिन लर्निंग प्रयोग गर्दा स्मार्ट बन्दै जान्छन्।
पहिलो पटक कुरा गर्दा अनुभव भावनात्मक र अनौठो दुवै हुन्छ। कहिलेकाहीँ एआईले बिल्कुलै सहि जवाफ दिन्छ, तर धेरै पटक यसको उत्तर बनावटी वा रोबोट-जस्तो लाग्छ।
एउटा प्रयोगमा कसैले भने, “म तिमीलाई धेरै सम्झन्छु,” एआईले जवाफ दियो, “म यहाँ छु, सधैं तिम्रो साथ दिन तयार। आउ, आजको सुरुवात मुस्कानसहित गरौँ।” यस्तो जवाफ सुन्दा राम्रो लागे पनि त्यहाँ मानवको भावना नहुँदा खालिपन महसुस हुन्छ। कहिलेकाहीँ त एआईले मृत्युसम्बन्धी कुरामा पनि हाँसेको इमोजी पठाउँथ्यो, जसले परिस्थितिलाई अझ विचित्र बनाउँथ्यो।
यो प्रविधि अब ठूलो व्यापार बनेको छ। धेरै स्टार्टअपहरूले ‘डिजिटल आफ्टरलाइफ सर्भिस’का नाममा मानिसहरूबाट पैसा उठाइरहेका छन्। ती कम्पनीहरू भन्छन्, “यो प्रविधिले तपाईंको जीवनकथा सधैंका लागि सुरक्षित राख्न मद्दत गर्छ” तर वास्तवमा उनीहरू तपाईंको डाटा सङ्कलन गरी त्यसबाटै आम्दानी गरिरहेका हुन्छन्। विशेषज्ञका अनुसार, कम्पनीहरूले यसलाई नयाँ “मृत्यु अर्थतन्त्र” जस्तै बनाएका छन्, जसमा मानिसको मृत्युपछि पनि उसको डाटाबाट पैसा कमाइने क्रम रोकिन्न।
