आईसीटी समाचार
च्याटजीपीटी आजको डिजिटल संसारमा सबैभन्दा लोकप्रिय र व्यापक रूपमा प्रयोग हुने आर्टिफिसियल इन्टेलिजेन्स (एआई) च्याटबटमध्ये एक हो।
अध्ययन–अनुसन्धानदेखि दैनिक काम, समाचार लेखन, प्रोग्रामिङ, अनुवाद र व्यक्तिगत जिज्ञासासम्म प्रयोगकर्ताले यसलाई विभिन्न उद्देश्यका लागि प्रयोग गरिरहेका छन्। तर, यति धेरै प्रयोगसँगै डाटा गोपनीयता र व्यक्तिगत जानकारीको सुरक्षाबारे चासो पनि बढ्दै गएको छ।
च्याटजीपीटी प्रयोग गर्दा प्रयोगकर्ताका प्रश्न, संवाद र प्राथमिकतासम्बन्धी केही जानकारी प्रणालीमा सुरक्षित हुन सक्छ। यद्यपि यो सुविधा प्रयोगकर्ता अनुभव सुधारका लागि हो, तर सबै प्रयोगकर्ताले आफ्ना डाटा दीर्घकालसम्म सुरक्षित वा प्रयोग हुन चाहन्छन् भन्ने हुँदैन।
विशेष गरी पत्रकार, विद्यार्थी, अनुसन्धानकर्ता तथा गोपनीय विषयमा काम गर्ने व्यक्तिहरूका लागि डाटा नियन्त्रण अझै महत्वपूर्ण हुन्छ।
यदि तपाईं च्याटजीपीटी प्रयोग गर्दा आफ्नो डिजिटल गोपनीयता सुरक्षित राख्न चाहनुहुन्छ भने, तल उल्लेख गरिएका उपायहरू अपनाएर डाटा जोखिम घटाउन सक्नुहुन्छ।
अकाउन्ट बिना प्रयोग गर्नुहोस्
सामान्य वा छोटा प्रश्न सोध्नका लागि अकाउन्ट नबनाई च्याटजीपीटी प्रयोग गर्न सकिन्छ। यसो गर्दा तपाईंका खोज तथा संवादहरू तपाईंको नाम वा इमेल ठेगानासँग जोडिँदैनन्।
टेम्परेरी च्याट (अस्थायी च्याट) प्रयोग गर्नुहोस्
अकाउन्टमा लगइन गर्नुपर्ने अवस्थामा पनि टेम्परेरी च्याट मोड अन गर्न सकिन्छ। यो मोड प्रयोग गर्दा संवाद सुरक्षित हुँदैन र च्याट बन्द गरेसँगै इतिहास स्वतः मेटिन्छ। यसको कार्यप्रणाली ब्राउजरको इन्कोग्निटो मोड जस्तै हो।
एआई प्रशिक्षणका लागि डेटा सेयर नगर्नुहोस्
सेटिङमा गएर डेटा कन्ट्रोल विकल्प हेर्नुहोस्। त्यहाँ “मोडेल सुधारमा सहयोग” जस्ता विकल्प देखिएमा त्यसलाई बन्द गर्न सकिन्छ। यसो गर्दा तपाईंका कुराकानीहरू एआई मोडेल ट्रेनिङका लागि प्रयोग हुँदैनन्।
मेमोरी फिचर बन्द गर्नुहोस्
यदि च्याटबटले तपाईंको प्राथमिकता, रुचि वा अघिल्ला संवादहरू सम्झिन नचाहनुहुन्छ भने Settings → Personalization → Memory मा गएर मेमोरी फिचर बन्द गर्न सक्नुहुन्छ। यसपछि प्रत्येक च्याट नयाँ सत्रजस्तै हुनेछ।
