आईसीटी समाचार
ढ्दो उमेरसँगै पीठ, घुँडा र काँध दुख्ने समस्या सामान्य बन्दै गएको छ। त्यस्तै, दुर्घटना वा शल्यक्रियापछि धेरै बिरामीलाई हिँडडुल र सामान्य गतिविधि गर्न कठिनाइ हुने गर्छ।
यस्ता अवस्थाहरूमा चिकित्सकहरूले प्रायः फिजियोथेरापी सिफारिस गर्ने गरेका छन्। तर बारम्बार अस्पताल वा क्लिनिक पुग्न सबैका लागि सहज नहुने भएकाले अब यसको विकल्पका रूपमा एआई फिजियोथेरापी लोकप्रिय बन्दै गएको छ।
एआई (कृत्रिम बुद्धिमत्ता) आधारित यो प्रणालीले बिरामीलाई घरमै बसेर फिजियोथेरापी गर्न सक्ने सुविधा प्रदान गर्छ। यसले समय, खर्च र यात्राको झन्झट कम गर्नुका साथै नियमित अभ्यासमा पनि सहयोग पुर्याउने अपेक्षा गरिएको छ।
कसरी काम गर्छ एआई फिजियोथेरापी?
एआई फिजियोथेरापीमा बिरामीले मोबाइल वा ट्याब्लेटसँग जोडिएको एआई क्यामेरा वा सेन्सरयुक्त डिभाइस प्रयोग गरेर एक्सरसाइज गर्छन्। एपमा उपलब्ध निर्देशनअनुसार अभ्यास गर्दा एआई सिस्टमले शरीरको स्थिति, चालढाल र कोण विश्लेषण गर्छ।
एक्सरसाइज गर्दा गल्ती भए तुरुन्त सुधारका संकेत दिन्छ र अभ्यासको प्रगति रिपोर्ट तयार पार्छ। केही प्लेटफर्महरूले यो डेटा रियल–टाइममा डाक्टर वा फिजियोथेरापिस्टसम्म पठाउने सुविधा पनि दिएका छन्, जसले आवश्यक सल्लाह दिन मद्दत गर्छ।
खर्च कति पर्छ?
रिपोर्टअनुसार एआई फिजियोथेरापीलाई परम्परागत फिजियोथेरापीको तुलनामा करिब ५० प्रतिशतसम्म सस्तो विकल्प मानिन्छ। लामो समयसम्म उपचार आवश्यक पर्ने बिरामीका लागि यो आर्थिक रूपमा पनि उपयोगी हुन सक्छ।
कहाँ उपलब्ध छ?
हाल केही डिजिटल हेल्थ प्लेटफर्महरूले एआई फिजियोथेरापी सेवा उपलब्ध गराइरहेका छन्। रिमोटफिजियोस, रिजोल्भ360 र फ्लेक्सिफाइमी जस्ता प्लेटफर्महरूले उपकरण घरमै डेलिभरी गर्ने, सेटअपदेखि प्रयोगसम्म सहयोग गर्ने सेवा प्रदान गर्छन्। एपमार्फत गाइडेड सेसन उपलब्ध हुने भएकाले प्रयोगकर्तालाई थप सहज हुन्छ।
सावधानी आवश्यक
यद्यपि एआई फिजियोथेरापीले धेरैलाई राहत दिन सक्ने देखिए पनि, उपचार सुरु गर्नु अघि डाक्टर वा प्रमाणित फिजियोथेरापिस्टसँग सल्लाह लिनु अनिवार्य मानिन्छ। सही निदान र उपयुक्त अभ्यासका लागि चिकित्सकीय मार्गदर्शन आवश्यक रहने विज्ञहरू बताउँछन्।
