आईसीटी समाचार
काठमाडौं । अमेरिकी अर्बपति इलन मस्कले फेरि टेक दुनियाँमा नयाँ प्रतिस्पर्धा सुरु गरेका छन् । यस पटक उनले WhatsApp लाई चुनौती दिने उद्देश्यले ‘XChat’ नामक नयाँ मेसेजिङ एप सार्वजनिक गरेका छन्, जुन हाल iPhone र iPad मा उपलब्ध भइसकेको छ ।
XChat के हो ?
‘XChat’लाई साधारण तर सुरक्षित मेसेजिङ एपका रूपमा प्रस्तुत गरिएको छ, जुन X (formerly Twitter) सँग जोडिएको छ । यसमा end-to-end encryption, विज्ञापनरहित सेवा र प्रयोगकर्ताको ट्र्याकिङ नहुने जस्ता विशेषता समावेश छन् ।
सुरुमा X प्लेटफर्मभित्रकै निजी मेसेजिङ सुविधाका रूपमा रहेको यो सेवा अहिले छुट्टै एपका रूपमा विकास गरिएको हो । मस्कको दीर्घकालीन लक्ष्य भने WeChat जस्तै एकै एपभित्र धेरै सेवा उपलब्ध गराउने ‘सुपर एप’ बनाउने रहेको बताइएको छ ।
मुख्य विशेषताहरू
XChat मा भ्वाइस तथा भिडियो कल, ४८१ जनासम्म सहभागी हुन सक्ने ग्रुप च्याट, डकुमेन्ट सेयरिङ, मेसेज एडिट र डिलिट गर्ने सुविधा, डिसअपियर हुने मेसेज तथा स्क्रिनसट ब्लकिङ जस्ता फिचरहरू समावेश छन् । यसको इन्टरफेस सरल र प्रयोगमैत्री बनाइएको छ ।
यस एपको अर्को विशेषता भनेको साइनअप प्रक्रिया हो । प्रयोगकर्ताले फोन नम्बर आवश्यक नपरी केवल आफ्नो X खाता प्रयोग गरेर लगइन गर्न सक्नेछन् । प्राविधिक रूपमा XChat ‘Rust’ प्रोग्रामिङ भाषामा निर्माण गरिएको छ, जुन छिटो र सुरक्षित प्रणालीका लागि चिनिन्छ । मस्कका अनुसार यसमा बिटक्वाइन शैलीको इन्क्रिप्सन प्रयोग गरिएको छ ।
कसरी प्रयोग गर्ने ?
XChat अप्रिल १७ मा सार्वजनिक गरिएको हो र हाल Apple App Store मार्फत iPhone र iPad प्रयोगकर्ताका लागि उपलब्ध छ । एप डाउनलोड गरी X खातामार्फत लगइन गरेपछि प्रयोग गर्न सकिन्छ । यो एप हाल ४६ भाषामा उपलब्ध छ भने एन्ड्रोइड संस्करण भने अझै सार्वजनिक भएको छैन ।
अहिले किन चर्चामा ?
हाल Meta विरुद्ध क्यालिफोर्नियामा दायर गरिएको एक सामूहिक मुद्दामा WhatsApp का निजी सन्देशहरूमा हस्तक्षेप गरिएको आरोप लागेको छ । यद्यपि Meta ले ती आरोप असत्य भएको दाबी गरेको छ । तर यस घटनाले प्रयोगकर्ताको गोपनीयता प्रति चिन्ता बढाएको बेला मस्कले XChat लाई सुरक्षित विकल्पका रूपमा अघि सारेका छन् ।
अब के आउँछ ?
भविष्यमा XChat लाई ‘X Money’ सँग जोड्ने योजना रहेको बताइएको छ, जसमार्फत प्रयोगकर्ताले आपसमा रकम पठाउने तथा क्रिप्टोकरन्सीमार्फत भुक्तानी गर्न सक्ने सम्भावना छ ।
हाल X प्लेटफर्मका ५० करोडभन्दा बढी मासिक प्रयोगकर्ता भएकाले XChat का लागि ठूलो आधार तयार रहेको छ । यद्यपि यो एप वास्तवमै WhatsApp को विकल्प बन्न सक्छ कि सक्दैन भन्ने कुरा समयले नै देखाउनेछ ।
