आईसीटी समाचार
काठमाडौं । हाल देशका धेरै क्षेत्रमा गर्मी बढीरहेको छ । यस्तो अवस्थामा तपाईंको एसी (एयर कन्डिसनर) ले राम्रोसँग चिसो नदिएमा वा स्लो कूलिङ गरिरहेको भए, तुरुन्तै मेकानिक बोलाउन आवश्यक नपर्न सक्छ । केही सामान्य तर प्रभावकारी उपाय अपनाएर पनि एसीको कूलिङ क्षमता सुधार गर्न सकिन्छ । यहाँ यस्ता ५ सजिला उपाय दिइएका छन्, जसले तपाईंको एसीलाई राम्रोसँग काम गर्न मद्दत गर्नेछ ।
१. एयर फिल्टर नियमित सफा गर्नुहोस्
सबैभन्दा पहिले एसीको एयर फिल्टर निकालेर राम्रोसँग धोएर सफा गर्नुहोस् । धुलोले भरिएको फिल्टरले हावा राम्रोसँग तान्न सक्दैन, जसले गर्दा एसीलाई चिसो बनाउन बढी मेहनत गर्नुपर्छ । यदि तपाईं एसी धेरै प्रयोग गर्नुहुन्छ भने, हप्तामा एक पटक फिल्टर सफा गर्नु उपयुक्त हुन्छ ।
२. आउटडोर युनिट सफा राख्नुहोस्
केवल इन्डोर युनिट मात्र होइन, एसीको बाहिर रहेको आउटडोर युनिट पनि समय समयमा सफा गर्नुपर्छ । त्यसमा जमेको धुलो, पात, फोहोर वा अन्य अवरोधहरूले कूलिङमा असर पार्न सक्छ । त्यसैले आउटडोर युनिट वरिपरि सफाइ राख्नु निकै आवश्यक हुन्छ ।
३. कोठा राम्रोसँग सिल गर्नुहोस्
एसी चलाइरहेको बेला कोठाको ढोका र झ्यालहरू ठीकसँग बन्द छन् कि छैनन् भन्ने कुरा सुनिश्चित गर्नुहोस् । यदि चिसो हावा बाहिर निस्किन्छ भने कोठा चाँडै चिसिँदैन । त्यसैले कोठा राम्रोसँग सिल गर्नु एसीको कूलिङ बढाउने महत्त्वपूर्ण उपाय हो ।
४. ब्लोअर र भेन्ट्स जाँच गर्नुहोस्
कोठाभित्रको हावा प्रवाह अर्थात् एयर फ्लो सही छ कि छैन भन्ने पनि जाँच गर्नुहोस् । साथै एसीका भेन्ट्स पर्दा, फर्निचर वा अन्य सामानले ढाकिएका छैनन् भन्ने कुरा पनि सुनिश्चित गर्नुपर्छ । हावा सजिलै फैलिन पायो भने कोठा छिटो चिसिन्छ ।
५. फ्यानको सहयोग लिनुहोस्
यदि सम्भव छ भने एसी सँगै फ्यान पनि चलाउनुहोस् । यसले कोठाभरि चिसो हावा समान रूपमा फैलाउन मद्दत गर्छ र कूलिङ प्रभाव अझ राम्रो हुन्छ ।
यसरी यी केही साधारण तर उपयोगी उपाय अपनाएर तपाईं आफ्नो एसीको कूलिङ क्षमता सुधार गर्न सक्नुहुन्छ र गर्मीमा सहज अनुभव लिन सक्नुहुन्छ ।
