आईसीटी समाचार
काठमाडौं । गुगलले आफ्ना विभिन्न उत्पादनहरूमा एआई सर्च विस्तार गर्ने योजनाअन्तर्गत युट्युबमा नयाँ सुविधा परीक्षण सुरु गरेको छ । “Ask YouTube” नामक यस फिचरले प्रयोगकर्तालाई जटिल प्रश्न सोध्न र भिडियो तथा टेक्स्ट समावेश भएका विस्तृत उत्तर पाउन सहयोग गर्छ ।
साथै, थप जानकारीका लागि follow-up प्रश्न सोध्ने सुविधा पनि उपलब्ध हुनेछ । यो प्रयोगात्मक फिचर हाल अमेरिकामा १८ वर्षभन्दा माथिका YouTube Premium प्रयोगकर्ताहरूका लागि उपलब्ध छ र ८ जुनसम्म परीक्षण गरिने जनाइएको छ ।
युट्युबको “Ask YouTube” एआई फिचर प्रयोग गर्न पहिले आफ्नो अकाउन्टमा यो सुविधा सक्रिय गर्नुपर्छ । त्यसपछि सर्च बारमा देखिने “Ask YouTube” बटनमा क्लिक गरी सुझाव प्रश्नहरू वा आफ्नै प्रश्न टाइप गर्न सकिन्छ । परिणाममा भिडियोसँगै टेक्स्ट र समय–चिन्ह (timestamp) सहित जानकारी देखिन्छ, र प्रयोगकर्ताले थप प्रश्न सोधेर जानकारी विस्तार गर्न सक्छन् ।
परीक्षणका क्रममा “Apollo 11” सम्बन्धी प्रश्नमा संक्षिप्त विवरण र सम्बन्धित भिडियो देखिएको थियो । तर केही प्रश्नहरूमा सामान्य भिडियो सूची मात्र देखिएको र केही अवस्थामा एआईले गलत जानकारी पनि दिएको पाइएको छ ।
प्रविधि कम्पनीहरू एआई प्रति निकै उत्साहित देखिए पनि सर्वसाधारण प्रयोगकर्ताको धारणा त्यति सकारात्मक छैन । विशेष गरी YouTube प्रयोगकर्ताहरू एआईबाट बनेका कम गुणस्तरीय सामाग्री प्रति असन्तुष्ट देखिन्छन् । नयाँ एआई सर्च फिचर सफल हुनका लागि यसले प्रयोगकर्तालाई छिटो र गुणस्तरीय सामग्री फेला पार्न सहयोग गर्नुपर्ने विश्लेषकहरूको भनाइ छ ।
