आईसीटी समाचार
काठमाडौं । प्रधानमन्त्री तथा मन्त्रिपरिषद्को कार्यालयको नाम दुरुपयोग गर्दै दैलेखको दुल्लु नगरपालिका १३ का वडासचिव कमल भण्डारीलाई फोनमार्फत धम्की दिएको आरोपमा एक युवक पक्राउ परेका छन् ।
पक्राउ पर्नेमा सुर्खेतको वीरेन्द्रनगर नगरपालिका ६ वीरेन्द्रचोक स्थायी घर भई हाल काठमाडौंको शंखमूल बस्दै आएका २२ वर्षीय प्रकाश खड्का रहेका छन् । उनलाई जिल्ला प्रहरी परिसर काठमाडौंले नियन्त्रणमा लिएको प्रहरीले जनाएको छ ।
प्रहरीका अनुसार खड्काले प्रधानमन्त्री तथा मन्त्रिपरिषद्को कार्यालयको नाम प्रयोग गरी राष्ट्रसेवक कर्मचारीलाई भय, त्रास तथा दबाब सिर्जना गर्ने उद्देश्यले अश्लील र अमर्यादित भाषा प्रयोग गर्दै धम्की दिएका थिए ।
घटनाबारे थप अनुसन्धान भइरहेको जिल्ला प्रहरी परिसर काठमाडौंका प्रवक्ता एसपी पवन भट्टराईले जानकारी दिए । यसअघि उक्त घटनामा संलग्न व्यक्तिमाथि कानुनी कारबाही प्रक्रिया अघि बढाउन प्रधानमन्त्री तथा मन्त्रिपरिषद्को कार्यालयले सुरक्षा तथा अनुसन्धान निकायलाई निर्देशन दिएको थियो ।
वडासचिव भण्डारीलाई धम्की दिएको अडिओ सामाजिक सञ्जालमा भाइरल भएपछि घटनाले व्यापक चर्चा पाएको थियो । अडिओ सार्वजनिक भएपछि प्रधानमन्त्री कार्यालयले विज्ञप्ति जारी गर्दै सरकारी निकायको नाम दुरुपयोग गरी राष्ट्रसेवक कर्मचारीलाई धम्क्याउने, दबाब दिने तथा त्रास सिर्जना गर्ने कार्य निन्दनीय र अस्वीकार्य भएको जनाएको थियो ।
साथै, प्रधानमन्त्री कार्यालय वा सचिवालयको नाम जोडेर आउने फोन, सन्देश वा संवादलाई आधिकारिक माध्यमबाट प्रमाणीकरण (भेरिफिकेसन) गरेर मात्र आवश्यक प्रक्रिया अघि बढाउन सबै सरकारी निकाय तथा कर्मचारीलाई आग्रह गरिएको थियो ।
