आईसीटी समाचार
काठमाडौं । नेपाली युवा उद्यमी मञ्च (एनवाईईएफ) काठमाडौं च्याप्टरद्वारा आयोजित ‘एनवाईईएफ स्टार्टअप अवार्ड’ को पाँचौँ संस्करण सम्पन्न भएको छ । नवप्रवर्तनशील स्टार्टअपहरूलाई पहिचान र प्रोत्साहन गर्ने उद्देश्यले आयोजना गरिएको यस प्रतियोगितामा उत्कृष्ट स्टार्टअपहरूलाई पुरस्कृत गरिएको छ ।
यस संस्करणको विजेता हप्पु ट्रीट्स घोषित भएको छ । विजेता स्टार्टअपले नगद ५ लाख रुपैयाँ पुरस्कार प्राप्त गरेको छ । त्यस्तै, प्रतियोगितामा गरुड एक्स मल्टिपर्पोज पहिलो रनरअप बनेको छ । उक्त स्टार्टअपले ३ लाख रुपैयाँ प्राप्त गरेको छ ।
यसैगरी, भर्मिका अर्गानिक्स दोस्रो रनरअप घोषित हुँदै २ लाख रुपैयाँ पुरस्कार प्राप्त गर्न सफल भएको छ । आयोजकका अनुसार प्रतियोगितामा सहभागी स्टार्टअपहरूलाई प्रारम्भिक छनोट, मूल्याङ्कन, मेन्टरिङ सत्र र अन्तिम चरणको पिचिङमार्फत छनोट गरिएको थियो ।
अन्तिम चरणमा व्यवसायिक योजना, नवप्रवर्तन, बजार सम्भावना र सामाजिक प्रभावलाई आधार मानेर विजेता चयन गरिएको हो । एनवाईईएफ स्टार्टअप अवार्डले नेपाली स्टार्टअप इकोसिस्टमलाई मजबुत बनाउन र युवा उद्यमीहरूलाई लगानी तथा नेटवर्किङ अवसर प्रदान गर्न महत्वपूर्ण भूमिका खेल्दै आएको छ ।
यसअघि चौथो संस्करणमा विभिन्न स्टार्टअपहरू पुरस्कृत भएका थिए, जसले नेपालमा उद्यमशीलता प्रवर्द्धनमा सकारात्मक प्रभाव पारेको आयोजकले जनाएको छ ।
