उद्योग दर्तादेखि नवीकरणसम्म, बागमतीका १३ जिल्लामा सबै सेवा अनलाइनबाटै

काठमाडौं । बागमती प्रदेश सरकारले उद्योग प्रशासनसम्बन्धी सेवालाई पूर्ण रूपमा डिजिटल बनाउने तयारी गरेको छ । आगामी आर्थिक वर्ष २०८३/८४ देखि प्रदेशका सबै १३ जिल्लामा उद्योग प्रशासन सेवा अनलाइन प्रणालीमार्फत सञ्चालन गर्ने लक्ष्य लिइएको हो ।

प्रदेशको उद्योग, वाणिज्य, भूमि तथा प्रशासन मन्त्रालयका प्रवक्ता कुमार तामाङका अनुसार हाल उद्योग तथा वाणिज्य कार्यालय, मकवानपुरबाट उद्योग दर्ता, नवीकरण, नामसारीलगायतका सेवा अनलाइनमार्फत प्रदान गर्न थालिएको छ । यही प्रणालीलाई विस्तार गर्दै प्रदेशका सबै जिल्लामा लागू गर्ने तयारी गरिएको उनले बताए ।

मन्त्रालयले चितवन, काभ्रेपलाञ्चोक, रामेछाप र सिन्धुली स्थित उद्योग तथा वाणिज्य कार्यालयलाई नमूना कार्यालय घोषणा गरिसकेको छ । आगामी आर्थिक वर्षभित्र प्रदेशका सबै १३ कार्यालयलाई नमूना कार्यालयका रूपमा विकास गर्ने लक्ष्यसहित आवश्यक बजेट विनियोजन गरिएको मन्त्रालयले जनाएको छ ।

यसका लागि मन्त्रालयले नमूना कार्यालय व्यवस्थापन मापदण्ड समेत तयार गरिसकेको छ । डिजिटल सेवा विस्तारसँगै उद्योग प्रशासनलाई थप छिटो, पारदर्शी र सेवाग्राहीमैत्री बनाउने लक्ष्य राखिएको मन्त्रालयको भनाइ छ ।

मन्त्रालयका अनुसार आर्थिक वर्ष २०८२/८३ को असार मसान्तसम्म बागमती प्रदेशमा ४ हजार ९५६ उद्योग र २ हजार ५५० वाणिज्य फर्म दर्ता भएका छन् । यसैबीच, बजारमा कालोबजारी र कृत्रिम अभाव नियन्त्रण गर्न नियमित तथा आकस्मिक बजार अनुगमनलाई निरन्तरता दिइएको मन्त्रालयले जनाएको छ ।