आईसीटी समाचार
काठमाडौं । असार महिनामा खपत भएको विद्युत्को बिलमा मूल्य अभिवृद्धि कर (भ्याट) समावेश गरिएपछि उपभोक्ताबाट व्यापक गुनासो आएसँगै ऊर्जा, जलस्रोत तथा सिँचाइ मन्त्री विराज भक्त श्रेष्ठले नेपाल विद्युत् प्राधिकरणलाई उपभोक्ताको हित सुनिश्चित हुने गरी आवश्यक पहल गर्न निर्देशन दिनुभएको छ ।
आर्थिक ऐन, २०८३ अनुसार साउन १ गतेदेखि विद्युत् सेवामा भ्याट लागू हुने व्यवस्था भए पनि असार महिनाको खपतमा समेत भ्याट जोडेर बिल पठाइएको भन्दै उपभोक्ताले विरोध जनाएका थिए । त्यसपछि मन्त्री श्रेष्ठले कानुनी र व्यवहारिक पक्ष स्पष्ट गरी उपभोक्तामाथि अतिरिक्त आर्थिक भार नपर्ने गरी समाधान खोज्न प्राधिकरणलाई निर्देशन दिनुभएको हो ।
मन्त्री श्रेष्ठले कर कार्यान्वयनका क्रममा देखिएको अन्योल तत्काल हटाउन र उपभोक्तालाई अन्याय हुने अवस्था सिर्जना हुन नदिन सम्बन्धित निकायलाई आवश्यक पहल गर्न आग्रह गर्नुभएको छ ।
मन्त्रीको निर्देशनपछि नेपाल विद्युत् प्राधिकरणले असार महिनाको विद्युत् खपतमा जारी गरिएको बिलमा भ्याट लाग्ने वा नलाग्ने विषयमा स्पष्ट कानुनी व्याख्याका लागि आन्तरिक राजस्व विभागसँग औपचारिक राय मागेको जनाएको छ ।
प्राधिकरणले न्यूनतम डिमान्ड चार्जमा समेत भ्याट लागू हुने वा नहुने विषयमा विभागको धारणा मागेको छ । विभागबाट प्राप्त हुने आधिकारिक रायका आधारमा आगामी महिनाको विद्युत् बिलमा आवश्यक मूल्य समायोजन गरिने प्राधिकरणले जनाएको छ ।
प्राधिकरणका अनुसार यस प्रक्रियाबाट असार महिनाको विद्युत् बिलमा भ्याटसम्बन्धी देखिएको अन्योल हट्ने र उपभोक्ताको गुनासोको उचित सम्बोधन हुने अपेक्षा गरिएको छ ।
