आईसीटी समाचार
काठमाडौं । विदेशमा रहेका नेपालीले देशको खबर खोजिरहेका हुन्छन्, नेपालमा रहेका परिवारले परदेशमा रहेका आफन्तसँग जोडिन चाहन्छन् । दूरी फरक भएपनि नेपाली समुदायबीचको सम्बन्ध, संस्कृति र अपनत्व भने एउटै छ । यही सम्बन्धलाई डिजिटल माध्यमबाट अझ नजिक ल्याउने उद्देश्यसहित नयाँ सामाजिक सञ्जाल ‘थोप्ला’ सार्वजनिक गरिएको छ ।
विश्वभर छरिएर रहेका नेपाली समुदायलाई एउटै डिजिटल प्लेटफर्ममार्फत जोड्ने लक्ष्यसहित विकास गरिएको थोप्लाको काठमाडौंमा आयोजित एक कार्यक्रममार्फत औपचारिक सुरुवात गरिएको हो । यसको संस्थापक उज्जल खनाल हुन् । थोप्लाका अनुसार यो केवल सामाजिक सञ्जालका रूपमा सीमित नरहेर नेपाली समुदाय, संस्कृति, सिर्जना, मनोरञ्जन र आपसी सहकार्यलाई एउटै डिजिटल स्पेसमा जोड्ने प्रयास हो ।
विचारदेखि प्रतिभासम्म, एउटै प्लेटफर्ममा
विश्वका विभिन्न मुलुकमा रहेका नेपालीलाई सहज रूपमा जोड्नु थोप्लाको प्रमुख उद्देश्य रहेको थोप्लाले जनाएको छ । प्रयोगकर्ताले आफ्ना विचार, सिर्जना तथा प्रतिभा प्रस्तुत गर्नुका साथै समुदायसँग निरन्तर सम्पर्कमा रहन सक्ने वातावरण निर्माण गर्ने लक्ष्य राखिएको छ ।
प्लेटफर्ममा प्रयोगकर्ताका लागि नि:शुल्क अडिओ तथा भिडिओ कल, पोस्ट, भिडिओ र रिल शेयर गर्नेलगायतका सुविधा उपलब्ध छन् । सामाजिक सञ्जालमा प्रयोगकर्ताको सहभागिता बढाउने उद्देश्यले आफ्नै ह्यासट्यागमार्फत विभिन्न प्रतियोगिता तथा टुर्नामेन्ट सञ्चालन गर्न सकिने व्यवस्था पनि गरिएको छ ।
सामाजिक सञ्जालसँगै डिजिटल कारोबारको सुविधा
थोप्लाले सामाजिक सञ्जालका सामान्य सुविधासँगै डिजिटल कारोबारलाई समेत आफ्नो प्लेटफर्ममा समेटेको जनाएको छ । यसका लागि डिजिटल क्वाइन, उपहार तथा वालेट प्रणाली समावेश गरिएको छ । यसले भविष्यमा प्रयोगकर्ताको सामाजिक गतिविधिलाई डिजिटल कारोबारसँग जोड्ने आधार तयार गर्ने अपेक्षा गरिएको थोप्लाले जनाएको छ ।
विपद्का बेला ‘म सुरक्षित छु’ भन्ने सन्देश
थोप्लाको अर्को विशेष पक्षका रूपमा ‘नेपाल क्राइसिस रेस्पोन्स सिस्टम’लाई अघि सारिएको छ । प्राकृतिक विपद् वा अन्य आपत्कालीन अवस्थामा मानिसको अवस्थाबारे परिवार तथा समुदायलाई तत्काल जानकारी दिन सकियोस् भन्ने उद्देश्यले यो प्रणाली विकास गरिएको थोप्लाले जनाएको छ ।
यसअन्तर्गत रहेको ‘म सुरक्षित छु’ (I am Safe) फिचरमार्फत प्रयोगकर्ताले आफू सुरक्षित रहेको जानकारी आफ्ना आफन्त तथा समुदायसम्म तत्काल पुर्याउन सक्नेछन् । नेपालजस्तो प्राकृतिक विपद्को जोखिम रहेको मुलुकमा यस्तो सुविधा आपत्कालीन अवस्थामा सूचना आदानप्रदानको वैकल्पिक माध्यम बन्न सक्ने थोप्लाको अपेक्षा छ ।
व्यवसायदेखि क्रिएटरसम्मलाई जोड्ने योजना
थोप्लाको योजना सामाजिक सञ्जालका सुविधामा मात्र सीमित छैन । आगामी दिनमा प्लेटफर्ममा व्यवसाय प्रवर्द्धन, स्थानीय कार्यक्रमको प्रचारप्रसार, सामुदायिक सेवा तथा क्रिएटरलाई सहयोग गर्ने सुविधा थप गर्दै लैजाने तयारी रहेको थोप्लाले जनाएको छ ।
यसले साना व्यवसाय, स्थानीय आयोजक, सामाग्री निर्माता तथा विभिन्न समुदायलाई एउटै डिजिटल प्लेटफर्ममा आफ्नो गतिविधि प्रस्तुत गर्ने अवसर दिने लक्ष्य राखेको छ ।
नेपाली पहिचानलाई डिजिटल संसारमा विस्तार गर्ने लक्ष्य
आज नेपाली समुदाय विश्वका विभिन्न देशमा फैलिएको छ । सामाजिक सञ्जालका कारण उनीहरूबीचको दूरी केही हदसम्म घटेको भएपनि नेपाली समुदायलाई केन्द्रमा राखेर सामाजिक सम्बन्ध, सिर्जना, संस्कृति र सहकार्यलाई एकै ठाउँमा समेट्ने प्लेटफर्मको आवश्यकता रहेको थोप्लाको बुझाइ छ ।
त्यसैले थोप्लालाई विश्वभरका नेपालीलाई एउटै डिजिटल समुदायमा जोड्ने साझा प्लेटफर्मका रूपमा विकास गर्ने लक्ष्य लिइएको छ । आगामी दिनमा नयाँ डिजिटल सेवा थप गर्दै प्लेटफर्मलाई थप परिष्कृत गर्ने योजना रहेको थोप्लाले जनाएको छ ।
नेपाली संस्कृति, सिर्जना र सहकार्यलाई डिजिटल माध्यमबाट विश्वभर फैलाउने थोप्लाको प्रयास कति प्रभावकारी हुन्छ भन्ने कुरा भने यसको प्रयोगकर्ता सहभागिता र आगामी विस्तारले तय गर्नेछ ।
