आईसीटी समाचार
काठमाडौं । नाइमा मोबिलिटी एक्सपोमा बजाजले चेतक शृङ्खलाका दुई नयाँ विद्युतीय स्कुटर सार्वजनिक गरेको छ । नेपालका लागि बजाजको आधिकारिक वितरक हंसराज हुलासचन्द एण्ड कम्पनीले मङ्गलबार प्रदर्शनीमा चेतक सी-२५०१ र चेतक सी-३५०३ मोडल प्रदर्शनीमा राखेको हो ।
सार्वजनिक गरिएका दुई मोडलमध्ये चेतक सी-२५०१ तुलनात्मक रूपमा सस्तो र किफायती संस्करणका रूपमा आएको छ । यसमा २.५ किलोवाट आवरको ब्याट्री प्याक दिइएको छ, जसले एकपटकको फुल चार्जमा १ सय १३ किलोमिटरसम्मको रेन्ज दिने कम्पनीको दाबी छ ।
प्रतिघण्टा ६० किलोमिटरको टप स्पिड रहेको यो स्कुटर ४ घण्टामा पूर्ण रूपमा चार्ज हुन्छ । सहरी क्षेत्रमा सहज आवतजावत चाहने प्रयोगकर्तालाई लक्षित गरी यो संस्करण ल्याइएको हो ।
यस्तै चेतक सी-३५०३ भने आधुनिक फिचरले भरिपूर्ण प्रिमियम इलेक्ट्रिक स्कुटरका रूपमा भित्र्याइएको छ । यसमा ३.५ किलोवाट आवरको लिथियम आयन ब्याट्री छ, जसले एकपटकको फुल चार्जमा १ सय ५३ किलोमिटरसम्मको रेन्ज दिने कम्पनीले जनाएको छ ।
प्रतिघण्टा ७० किलोमिटर टप स्पिड रहेको यस मोडलमा ३५ लिटरको ठूलो बुट स्पेस र कलर एलसीडी डिस्प्ले राखिएको छ । साथै यसमा फुल मेटल बडी, हिल होल्ड असिस्ट, इको र स्पोर्ट राइड मोड, ब्लुटुथ कनेक्टिभिटी, कल तथा नोटिफिकेसन, म्युजिक कन्ट्रोल, रिभर्स मोड र कम्बाइन्ड ब्रेकिङ सिस्टम लगायतका फिचर समावेश छन् ।
