आईसीटी समाचार
पोखरा । गण्डकी प्रदेशमा सञ्चालित रेडियो तथा टेलिभिजनको दर्ता र नवीकरण प्रक्रिया अब अनलाइनबाटै गर्न सकिने भएको छ । प्रेस रजिष्ट्रारको कार्यालय, गण्डकीले छुट्टै सफ्टवेयरमार्फत प्रसारण संस्थाको दर्ता तथा नवीकरण सेवा सुरु गरेको हो ।
अनलाइनबाट नवीकरण गरिएका रेडियो र टेलिभिजनलाई शुक्रबार पहिलोपटक प्रदेशमै नवीकरण प्रमाणपत्रसमेत प्रदान गरिएको छ । यससँगै प्रसारण संस्थाको इजाजतपत्र नवीकरणका लागि काठमाडौं धाउनुपर्ने बाध्यता अन्त्य भएको प्रेस रजिष्ट्रार विमला भण्डारीले बताइन् ।
उनका अनुसार अब प्रसारण संस्थाले नवीकरणका लागि आवश्यक प्रक्रिया अनलाइनबाट पूरा गर्न सक्नेछन् । नवीकरण प्रमाणपत्र पनि अनलाइनबाटै प्राप्त गर्न सकिनेछ भने आवश्यक परे कार्यालयबाट समेत लिन सकिने व्यवस्था गरिएको छ ।
नयाँ प्रणालीले दर्ता तथा नवीकरण प्रक्रियामा लाग्ने समय र खर्च घटाउनुका साथै प्रशासनिक झन्झट समेत कम गर्ने कार्यालयको अपेक्षा छ । प्रेस रजिष्ट्रार भण्डारीले प्रसारण संस्थाको इजाजतपत्र नवीकरण तथा राजस्व बुझाउने कामका लागि प्रदेशमै रहेको कार्यालयमा सम्पर्क गर्न आग्रह गरेकी छन् ।
यसैबीच, अनलाइन सञ्चारमाध्यमको दर्ता तथा नवीकरण सेवा पनि प्रदेशबाटै सञ्चालन गर्न आवश्यक नीतिगत व्यवस्था मिलाउन प्रदेश समस्या समाधान समितिको बैठकमार्फत संघीय सरकारलाई अनुरोध गरिएको उनले जानकारी दिइन् ।
