इन्स्टाग्राममा पोस्ट सेड्युल कसरी गर्ने ? यस्तो छ सजिलो प्रक्रिया

काठमाडौं । इन्स्टाग्राम विश्वका लोकप्रिय सामाजिक सञ्जालमध्ये एक हो । यहाँ फोटो तथा भिडियो सेयर गर्नेदेखि विभिन्न उपयोगी सुविधा प्रयोग गर्न सकिन्छ । तीमध्ये पोस्टलाई भविष्यको निश्चित मिति र समयमा स्वत: प्रकाशित हुने गरी सेड्युल गर्न सकिने सुविधा पनि महत्वपूर्ण छ ।

इन्स्टाग्रामले केही वर्षअघि यो सुविधा ल्याएको हो । यसले विशेष गरी कन्टेन्ट क्रिएटरलाई नियमित रूपमा पोस्ट गर्न सहज बनाउनुका साथै समय बचत गर्छ र पोस्ट गर्न बिर्सिने सम्भावना पनि कम गर्छ ।

इन्स्टाग्रामको सेड्युल पोस्ट सुविधामार्फत प्रयोगकर्ताले पोस्ट तयार गरेर निश्चित मिति र समयमा स्वत: प्रकाशित हुने गरी राख्न सक्छन् । यो सुविधा विशेष गरी व्यवसाय, कन्टेन्ट क्रिएटर तथा निश्चित समयमा पोस्ट गर्नुपर्ने व्यक्तिका लागि उपयोगी हुन्छ ।

यस सुविधाबाट प्रयोगकर्ताले आफ्नो पोस्टिङको योजना पहिले नै बनाउन सक्छन् । साथै, पोस्ट प्रकाशित हुने समयमा अनलाइन भइरहनुपर्ने बाध्यता पनि हुँदैन । यद्यपि, इन्स्टाग्रामका अनुसार प्रोडक्ट ट्यागिङ, कोलाबोरेटिभ पोस्ट र स्पोन्सर्ड पोस्टलगायत केही सुविधा सेड्युल गरिएका पोस्टमा उपलब्ध हुँदैनन् ।

सार्वजनिक अकाउन्ट भएका प्रयोगकर्ताले इन्स्टाग्राम एपबाट फोटो, क्यारोसेल र रिल्स सेड्युल गर्न सक्छन् । यसका लागि अकाउन्ट सार्वजनिक हुनुपर्ने हुन्छ । एक दिनमा अधिकतम २५ वटा पोस्ट सेड्युल गर्न सकिन्छ भने कुनै पोस्टलाई अधिकतम ३० दिनअघिसम्म सेड्युल गर्न सकिन्छ ।

त्यसैगरी, पोस्ट सेड्युल गर्दा तय गरिएको गोपनीयता तथा दर्शकसम्बन्धी सेटिङ पोस्ट प्रकाशित हुँदासमेत यथावत् रहन्छ ।

इन्स्टाग्राममा पोस्ट सेड्युल गर्ने तरिका
इन्स्टाग्राममा पोस्ट वा रिल्सलाई निश्चित मिति र समयमा स्वतः प्रकाशित हुने गरी सेड्युल गर्न निम्न चरण पूरा गर्नुहोस् :
१. इन्स्टाग्राम एप खोल्नुहोस् र माथिल्लो बायाँ भागमा रहेको Create विकल्पमा थिच्नुहोस् । वैकल्पिक रूपमा फिडबाट दायाँतर्फ स्वाइप गरेर Post वा Reel छान्न सकिन्छ ।
२. सेयर गर्न चाहेको फोटो वा भिडियो चयन गरी Next मा थिच्नुहोस् ।
३. आवश्यकता अनुसार क्याप्सन, इफेक्ट वा फिल्टर थप्नुहोस् ।
४. त्यसपछि तल स्क्रोल गरेर More options मा जानुहोस् ।
५. त्यहाँ रहेको Schedule this post वा Schedule this Reel विकल्प सक्रिय गर्नुहोस् ।
६. अब पोस्ट प्रकाशित गर्न चाहेको मिति र समय चयन गर्नुहोस् ।
७. मिति र समय तय गरेपछि Done मा थिचेर सेटिङ पुष्टि गर्नुहोस् ।
८. अघिल्लो पृष्ठमा फर्किएपछि अन्तिममा Schedule मा थिच्नुहोस् ।

यति गरेपछि पोस्ट वा रिल्स तपाईंले तय गरेको मिति र समयमा स्वत: प्रकाशित हुनेछ । यसरी प्रयोगकर्ताले आफ्नो कन्टेन्ट पहिले नै तयार गरेर पोस्टिङलाई व्यवस्थित रूपमा व्यवस्थापन गर्न सक्छन् ।