आईसीटी समाचार
काठमाडौं । ब्रिटिश एजुकेसन ग्रुपअन्तर्गतको तथा द ब्रिटिश कलेजको भगिनी संस्था ब्रिटिश मोडल कलेज (बीएमसी) का विद्यार्थीहरूले क्याम्ब्रिज इन्टरनेसनल एएस एन्ड ए लेभल मे/जुन २०२६ परीक्षामा उत्कृष्ट नतिजा हासिल गरेका छन् ।
परीक्षामा सहभागी १०६ जना विद्यार्थीजमध्ये ९४ प्रतिशत उत्तीर्ण भएका छन् । नतिजाअनुसार ७ जना विद्यार्थीले लगातार ए स्टार तथा ३३ जनाले लगातार ए ग्रेड हासिल गरेका छन् । कलेजका अनुसार यो नतिजाले विद्यार्थीहरूको शैक्षिक प्रतिबद्धता र कलेजले प्रदान गर्दै आएको सहयोगी सिकाइ वातावरणलाई प्रतिबिम्बित गर्छ ।
कलेजले विद्यार्थीहरूको महिनौँको निरन्तर तयारी, शिक्षकहरूको समर्पण तथा अभिभावकको निरन्तर प्रोत्साहन र सहयोगका कारण यस्तो उपलब्धि हासिल भएको जनाएको छ ।
ब्रिटिश एजुकेसन ग्रुपका हेड अफ स्कुल्स राजन कुमार राईले विद्यार्थी, शिक्षक तथा अभिभावकलाई बधाई दिँदै यो उपलब्धि बीएमसी र समग्र ब्रिटिश एजुकेसन ग्रुपका लागि गर्वको क्षण भएको बताए ।
उनले विद्यार्थीमा शैक्षिक उत्कृष्टता, आत्मविश्वास र महत्त्वाकांक्षा विकास गर्ने वातावरण निर्माणप्रतिको प्रतिबद्धतालाई नतिजाले पुष्टि गरेको बताए । बीएमसी तथा ब्रिटिश एजुकेसन ग्रुपले विद्यार्थीलाई आगामी शैक्षिक तथा व्यावसायिक यात्रामा सफल बनाउन आवश्यक आधार प्रदान गर्न निरन्तर काम गर्ने उनको भनाइ छ ।
ए लेभल पूरा गरेका विद्यार्थीका लागि प्राप्त नतिजा उच्च शिक्षातर्फको आगामी यात्रा तथा भावी करियरका लागि महत्त्वपूर्ण उपलब्धि बनेको कलेजले जनाएको छ ।
बीएमसीले उत्कृष्ट नतिजा हासिल गर्ने सबै विद्यार्थीलाई बधाई दिँदै उपलब्धिमा योगदान पुर्याउने शिक्षक, अभिभावक तथा सम्पूर्ण कलेज परिवारप्रति आभार व्यक्त गरेको छ ।
