आईसीटी समाचार
काठमाडौं । नयाँ बानेश्वरस्थित निजामती कर्मचारी अस्पताल (सिभिल अस्पताल) मा उपचारका लागि पुग्ने बिरामीले ओपीडी टिकट लिनै घण्टौँ समय खर्चिनुपर्ने अवस्था देखिएको छ । अस्पताल खुल्ने समय नजिकिँदै गर्दा परिसरमा बिरामी तथा उनीहरूका आफन्तको भीड बढ्ने गरेको छ ।
बिहान करिब ५ बजेदेखि नै टिकट लिन अस्पताल पुग्नेहरूको संख्या उल्लेख्य हुने गरेको छ । उपचारका लागि टाढा टाढाबाट आउने कतिपय बिरामीले सेवा लिनुअघि नै लामो समय लाइनमा बिताउनुपर्ने बाध्यता रहेको गुनासो गरेका छन् ।
बिरामीको संख्या बढ्दै गएपनि टिकट वितरणको व्यवस्थापन र सेवाग्राहीको सहजताका लागि पर्याप्त सुधार हुन नसकेको उनीहरूको भनाइ छ । विशेष गरी बिहानको समयमा एकैपटक ठूलो संख्यामा सेवाग्राही अस्पताल पुग्दा लाइन व्यवस्थापन चुनौतीपूर्ण बन्ने गरेको छ ।
ओपीडी टिकट लिन लामो समय प्रतीक्षा गर्नुपर्ने अवस्थाले उपचार सेवामा पहुँच सहज भएपनि अस्पताल पुग्ने प्रारम्भिक प्रक्रियामै सेवाग्राहीले सास्ती खेप्नुपरेको देखिन्छ । प्रविधिको प्रयोग, टिकट वितरण प्रणालीको विस्तार तथा भीड व्यवस्थापनमा सुधार गर्न सके बिरामीको समय बचाउन सकिने सेवाग्राहीहरूको अपेक्षा छ ।
सिभिल अस्पतालमा देखिएको यो अवस्था सरकारी स्वास्थ्य संस्थामा बिरामीको बढ्दो चापको एउटा उदाहरण मात्रै हो । राजधानीसहित देशका विभिन्न सरकारी अस्पतालमा उपचारका लागि आउने सेवाग्राहीको संख्या बढ्दै जाँदा टिकट, दर्ता र ओपीडी सेवामा भीड व्यवस्थापन चुनौती बन्दै गएको छ ।
सरकारी अस्पतालमा सर्वसाधारणको निर्भरता बढिरहेको अवस्थामा उपचारको गुणस्तरसँगै सेवा लिनुअघि पूरा गर्नुपर्ने प्रक्रियालाई समेत सहज बनाउनु आवश्यक देखिएको छ ।
