आईसीटी समाचार
काठमाडौं । विपद्का बेला सर्वसाधारणको सहानुभूति र सहयोगको भावनालाई दुरुपयोग गर्दै ठगी गर्ने गतिविधि बढेको भन्दै नेपाल प्रहरीले सचेत रहन आग्रह गरेको छ ।
प्रहरीका अनुसार केही व्यक्तिले सामाजिक सञ्जालमा ‘प्रधानमन्त्री दैवी प्रकोप उद्धार कोष’ तथा ‘प्रधानमन्त्री राहत कोष’ को नाम र पहिचान प्रयोग गरेर सर्वसाधारणबाट रकम संकलन गर्ने प्रयास गरिरहेका छन् ।
उनीहरूले व्यक्तिगत बैंक खाता तथा विभिन्न ई-वालेटमा पैसा पठाउन आग्रह गर्नुका साथै वास्तविकतासँग मेल नखाने राहतसम्बन्धी अपिल समेत सार्वजनिक गर्ने गरेको पाइएको प्रहरीले जनाएको छ ।
यस्ता गतिविधिलाई लक्षित गर्दै प्रहरीले ‘स्क्याम अलर्ट’ जारी गरेको छ । विपद्को समयमा सार्वजनिक हुने अपिल, सहयोगसम्बन्धी सूचना र रकम जम्मा गर्न दिइएका विवरणको आधिकारिकता यकिन नगरी विश्वास नगर्न प्रहरीले सर्वसाधारणलाई आग्रह गरेको छ ।
प्रहरीले राहत तथा सहयोगका नाममा सामाजिक सञ्जालमा प्रसारित हुने सामग्रीका आधारमा अपरिचित व्यक्ति वा संस्थाको खातामा रकम नपठाउन पनि अनुरोध गरेको छ । आधिकारिक निकायबाट जारी भएका सूचना र प्रमाणित माध्यममार्फत मात्रै सहयोग गर्न आग्रह गरिएको छ ।
