आईसीटी समाचार
काठमाडौं । चीनको दक्षिणपश्चिमी तिब्बत स्वायत्त क्षेत्रको ग्यिरोङ काउन्टीमा पहिरोका कारण प्रभावित भएको क्षेत्रमा सञ्चार सेवा सुधार गर्न नयाँ ४जी/५जी बेस स्टेसन सञ्चालनमा ल्याइएको छ ।
सिन्ह्वाका अनुसार ग्यिरोङ बन्दरगाहमा गएको पहिरोबाट प्रभावित मुख्य उद्धारस्थल नजिकै निर्माण गरिएको उक्त बेस स्टेसन आइतबारदेखि सञ्चालनमा आएको हो । नयाँ बेस स्टेसन पहिरो प्रभावित क्षेत्रबाट करिब ९०० मिटरको दूरीमा स्थापना गरिएको जनाइएको छ ।
बेस स्टेसन सञ्चालनमा आएसँगै उद्धार तथा राहत कार्यमा खटिएका टोलीका लागि मोबाइल सञ्चार सेवा थप स्थिर बनेको छ । यसले प्रभावित क्षेत्रमा उद्धार गतिविधिको समन्वय तथा आवश्यक सूचना आदानप्रदानलाई सहज बनाउने अपेक्षा गरिएको छ ।
पहिरोका कारण क्षतिग्रस्त भएको अप्टिकल फाइबर केबलको अवस्था पहिचान तथा मर्मतका लागि सञ्चार प्राविधिक टोलीसमेत प्रभावित क्षेत्रमा परिचालन गरिएको छ । टोलीले क्षतिग्रस्त केबलको स्थान पहिचान गरी सञ्चार सेवा पूर्ण रूपमा पुन:स्थापना गर्ने काम अघि बढाइरहेको छ ।
ग्यिरोङ बन्दरगाह क्षेत्रमा बुधबार गएको ठूलो पहिरोले सडक, विद्युत् तथा सञ्चार पूर्वाधारमा क्षति पुर्याएको थियो । पूर्वाधारमा क्षति पुगेसँगै सञ्चार सेवा प्रभावित हुँदा खोज तथा उद्धार अभियानमा समेत समस्या उत्पन्न भएको थियो ।
यसैबीच, प्रभावित क्षेत्रमा सञ्चार सेवा सुधार गर्न प्राविधिक टोलीले वैकल्पिक पूर्वाधार निर्माण तथा सेवा विस्तारको कामलाई तीव्रता दिएको छ । नयाँ ४जी/५जी बेस स्टेसन सञ्चालनमा आएपछि उद्धारकर्मी, राहत टोली तथा सम्बन्धित निकायबीच सञ्चार सम्पर्क थप सहज हुने र पहिरो प्रभावित क्षेत्रमा खोज तथा उद्धार कार्यको समन्वय प्रभावकारी बन्ने अपेक्षा गरिएको छ ।
क्षतिग्रस्त अप्टिकल केबलको खोजी तथा मर्मतको काम जारी रहेकाले आगामी दिनमा सञ्चार सेवा थप स्थिर हुने बताइएको छ ।
