आईसीटी समाचार
चितवन । सवारी चालक अनुमतिपत्रको स्मार्ट कार्ड लिन भरतपुर पुग्नुपर्ने कालिका नगरवासीको बाध्यता हटेको छ । कालिका नगरपालिकाले यातायात व्यवस्था कार्यालय भरतपुरसँगको सहकार्यमा नगरपालिकाको कार्यालयबाटै स्मार्ट कार्ड लाइसेन्स वितरण सुरु गरेको हो ।
यातायात व्यवस्था विभागबाट छपाइ भएर आएका स्मार्ट कार्ड अब सम्बन्धित सेवाग्राहीले कालिका नगरपालिकामार्फत प्राप्त गर्न सक्नेछन् । यससँगै लाइसेन्स लिनका लागि मात्र भरतपुर पुग्नुपर्ने समय र खर्च बचत हुने भएको छ ।
नगरप्रमुख विनोद रेग्मीका अनुसार स्थानीय नागरिकलाई आवश्यक सरकारी सेवा आफ्नै स्थानीय तहबाट उपलब्ध गराउने योजनाअन्तर्गत स्मार्ट कार्ड वितरण सेवा सुरु गरिएको हो ।
उनका अनुसार नगरपालिकाले सरकारी सेवाको पहुँच स्थानीय तहमै विस्तार गर्ने नीतिलाई प्राथमिकतामा राखेको छ । “सरकारी सेवा सकेसम्म नगरपालिकाबाटै उपलब्ध गराउने हाम्रो लक्ष्य हो,” उनले भने ।
नगरपालिकाले मालपोत र नापीसम्बन्धी सेवा स्थानीय तहबाटै उपलब्ध गराउँदै आएको छ । त्यस्तै, प्यान नम्बर र श्रम स्वीकृतिसम्बन्धी सेवा विस्तारको काम अघि बढाइएको छ भने राष्ट्रिय परिचयपत्रका लागि फोटो खिच्नेलगायतका सेवा पनि नगरपालिकाबाटै उपलब्ध गराउने तयारी भइरहेको रेग्मीले बताए ।
चितवनमै स्थानीय तहबाट यस्तो सेवा सुरु गर्ने पहिलो
यातायात व्यवस्था कार्यालय चितवनका प्रमुख अमृत अधिकारीका अनुसार कालिका नगरपालिकासँग भएको सम्झौताअनुसार अहिले स्मार्ट कार्ड चालक अनुमतिपत्र वितरणको सेवा मात्र सञ्चालनमा ल्याइएको हो ।
उनका अनुसार चितवनमा स्थानीय तहसँगको सहकार्यमा यस किसिमको सेवा सुरु गर्ने कालिका नगरपालिका पहिलो स्थानीय तह बनेको छ । विभागबाट छपाइ भएर यातायात कार्यालयमा आएका स्मार्ट कार्डलाई नगरपालिकामार्फत सम्बन्धित सेवाग्राहीसम्म पुर्याइने व्यवस्था गरिएको अधिकारीले बताए ।
यसले विशेषगरी लाइसेन्स तयार भइसकेपछि कार्ड लिनकै लागि भरतपुर पुग्नुपर्ने सेवाग्राहीलाई प्रत्यक्ष सुविधा पुग्ने उनको भनाइ छ ।
ट्रायल र लाइसेन्सको आवेदन भने अनलाइनबाट
यातायात व्यवस्था कार्यालयमा नयाँ चालक अनुमतिपत्र तथा वर्ग थपका लागि लिइने ट्रायलसम्बन्धी काम हाल स्थगित रहेको अधिकारीले जानकारी दिए । तर चालक अनुमतिपत्र लिन वा नवीकरण गर्न आवश्यक प्रारम्भिक प्रक्रिया भने अनलाइनबाट गर्न सकिने व्यवस्था रहेको उनले बताए ।
सेवाग्राहीले अनलाइनबाट आवेदन फाराम भर्नुका साथै तोकिएको शुल्क समेत विद्युतीय माध्यमबाट भुक्तानी गर्न सक्नेछन् । राष्ट्रिय परिचयपत्र तथा नागरिक एपमा उपलब्ध क्यूआर स्क्यान गरेर समेत आवेदन प्रक्रिया अघि बढाउन सकिने व्यवस्था रहेको कार्यालयले जनाएको छ ।
