आईसीटी समाचार
काठमाडौं । कनेक्ट आईपीएस प्रयोगकर्तालाई लक्षित गरेर साइबर अपराधीहरूले ठगीको नयाँ प्रयास गरिरहेको पाइएको छ । नेपाल प्रहरीको साइबर ब्युरोले खाता रोक्का भएको वा असामान्य गतिविधि देखिएको भन्दै आउने शंकास्पद सन्देश र लिङ्कबाट सावधान रहन सर्वसाधारणलाई आग्रह गरेको छ ।
ब्युरोका अनुसार ठगीमा संलग्नहरूले प्रयोगकर्तालाई हतारमा निर्णय लिन बाध्य पार्ने उद्देश्यले मोबाइलमा विभिन्न प्रकारका एसएमएस पठाउने गरेका छन् । ‘खातामा असामान्य गतिविधि देखिएको’, ‘खाता अस्थायी रूपमा रोक्का गरिएको’ वा ‘खाता पुन: सञ्चालनका लागि प्रमाणीकरण आवश्यक रहेको’ जस्ता दाबी गरेर पठाइने सन्देश यसका उदाहरण हुन् ।
यस्ता सन्देशमा कनेक्ट आईपीएसको आधिकारिक वेबसाइटजस्तै देखिने नक्कली लिङ्क राखिएको हुने ब्युरोले जनाएको छ । login-connectips वा verify-connectips जस्ता नाम प्रयोग गरिएका ती लिङ्कमा क्लिक गराउँदा प्रयोगकर्तालाई नक्कली पेजमा पुर्याएर गोप्य विवरण माग्ने गरिएको पाइएको छ ।
त्यस्ता पेजमा प्रयोगकर्ताको युजरनेम, पासवर्ड तथा ओटीपी कोडजस्ता संवेदनशील विवरण प्रविष्ट गर्न लगाएर प्राप्त जानकारीको दुरुपयोग गर्ने र बैंक खातामा रहेको रकम चोरी गर्ने प्रयास हुन सक्ने ब्युरोको चेतावनी छ ।
शंकास्पद एसएमएस आए के गर्ने ?
साइबर ब्युरोले अपरिचित नम्बर वा अविश्वसनीय स्रोतबाट आएका सन्देशलाई बेवास्ता गर्न आग्रह गरेको छ । विशेष गरी खाता बन्द हुने, रोक्का हुने वा तत्काल प्रमाणीकरण गर्नुपर्ने भन्दै दबाब सिर्जना गर्ने मेसेजमा आएका लिङ्क नखोल्न ब्युरोले सचेत गराएको छ ।
प्रयोगकर्ताले शंकास्पद वेबसाइटमा गएर कुनै फाराम भर्नुका साथै युजरनेम, पासवर्ड, ओटीपी वा अन्य व्यक्तिगत तथा बैंकिङ विवरण उपलब्ध नगराउनुपर्ने ब्युरोको भनाइ छ । कुनै सन्देश वास्तविक हो कि होइन भन्नेमा अन्योल भएमा मेसेजमा दिइएको लिङ्क वा सम्पर्क नम्बर प्रयोग नगरी सम्बन्धित बैंक तथा वित्तीय संस्थासँग प्रत्यक्ष सम्पर्क गर्न ब्युरोले सुझाव दिएको छ ।
कनेक्ट आईपीएस खातासम्बन्धी समस्या वा शंका भएमा नेपाल क्लियरिङ हाउस लिमिटेड (एनसीएचएल) बाट समेत आधिकारिक जानकारी लिन सकिने ब्युरोले जनाएको छ । साथै, बैंक तथा डिजिटल वालेटका सेवा र सूचनाबारे जानकारी लिँदा सम्बन्धित संस्थाका आधिकारिक वेबसाइट, एप वा सामाजिक सञ्जाल पेजजस्ता विश्वसनीय माध्यम मात्र प्रयोग गर्न प्रहरीले आग्रह गरेको छ ।
ब्युरोले डिजिटल कारोबार बढेसँगै प्रयोगकर्तालाई भ्रममा पारेर गोप्य विवरण हात पार्ने प्रयास समेत बढ्न सक्ने भएकाले कुनै पनि सन्देशको विश्वसनीयता जाँच नगरी लिंक खोल्ने वा विवरण भर्ने काम नगर्न सर्वसाधारणलाई सचेत गराएको छ ।
