आईसीटी समाचार
काठमाडौं । गुगलले आफ्नो गोपनीयता नीतिमा परिवर्तन गरेको छ । नयाँ व्यवस्थाअनुसार प्रयोगकर्ताले जीमेल, गुगल ड्राइभ र गुगल फोटोजको डेटा अन्य गुगल सेवासँग सेयर गर्न अनुमति दिएमा उक्त डेटा व्यक्तिगत रुचिअनुसारका विज्ञापन देखाउनसमेत प्रयोग हुन सक्नेछ ।
प्रविधिसम्बन्धी वेबसाइट एन्ड्रोइड अथोरिटीको रिपोर्टअनुसार गुगलले अक्टोबर १६ मा आफ्नो नीतिमा यो परिवर्तन गरेको हो । यसअघि कम्पनीको नीतिमा यी सेवाबाट प्राप्त डेटा व्यक्तिगत विज्ञापन देखाउन प्रयोग नगरिने उल्लेख थियो । नयाँ नीतिमा भने अन्य गुगल सेवासँग सेयर गरिएको डेटाको प्रयोगमा अपवाद थपिएको छ ।
यो परिवर्तनले विशेष गरी जीमेल, गुगल ड्राइभ वा गुगल फोटोजलाई गुगलको पर्सनल इन्टेलिजेन्स सुविधा तथा कृत्रिम बुद्धिमत्ता (एआई) मा आधारित सर्च टुलसँग जोड्ने प्रयोगकर्तालाई प्रभाव पार्न सक्छ ।
जीमेल र गुगल फोटोजको डेटा कसरी प्रयोग हुन सक्छ ?
गुगलको पर्सनल इन्टेलिजेन्स सुविधा प्रयोगकर्ताका विभिन्न कनेक्ट गरिएका एपबाट प्राप्त जानकारीका आधारमा व्यक्तिगत रुचिअनुसारका जवाफ तथा सुझाव उपलब्ध गराउन बनाइएको हो ।
उदाहरणका लागि, प्रयोगकर्ताले जीमेल वा गुगल फोटोजको डेटा पहुँच गर्न अनुमति दिएमा गुगल सर्च र जेमिनाईले त्यहाँ उपलब्ध जानकारीका आधारमा थप सान्दर्भिक जवाफ तथा सुझाव दिन सक्छन् ।
नयाँ नीतिअनुसार यस्ता सेवाबाट सेयर गरिएको डेटा सामग्रीलाई व्यक्तिगत रुचिअनुसार अनुकूलित गर्न पनि प्रयोग हुन सक्छ । यसमा विज्ञापन समेत पर्न सक्छन् । यद्यपि, डेटाको प्रयोग प्रयोगकर्ताको गोपनीयता सेटिङ र सम्बन्धित सेवालाई दिइएको अनुमतिमा निर्भर हुनेछ ।
यसको अर्थ सबै प्रयोगकर्ताको जीमेल वा गुगल फोटोजको डेटा स्वतः विज्ञापनका लागि प्रयोग हुन थाल्छ भन्ने होइन । कुन सेवा जोडिएको छ र प्रयोगकर्ताले कस्ता अनुमति दिएका छन् भन्ने आधारमा डेटाको प्रयोग निर्धारण हुनेछ ।
के विज्ञापनदाताले तपाईंको निजी डेटा हेर्न पाउँछन् ?
गुगलका अनुसार विज्ञापनदातालाई प्रयोगकर्ताको जीमेल, गुगल ड्राइभ वा गुगल फोटोजको डेटामा प्रत्यक्ष पहुँच दिइँदैन । त्यस्तै, यस प्रक्रियामार्फत प्रयोगकर्ताको नाम वा इमेल ठेगानाजस्ता व्यक्तिगत पहिचान खुलाउने विवरण पनि विज्ञापनदातालाई उपलब्ध नगराइने कम्पनीको भनाइ छ ।
कम्पनीले जातीय पृष्ठभूमि, यौन अभिमुखीकरण, धर्म वा स्वास्थ्यजस्ता संवेदनशील वर्गका आधारमा विज्ञापन नदेखाइने पनि जनाएको छ ।
गुगलको नयाँ गोपनीयता नीतिमा के छ ?
अद्यावधिक नीतिअनुसार प्रयोगकर्ताले गुगल सर्च, जेमिनाईलगायतका सेवाहरूलाई जीमेल, गुगल फोटोज र गुगल वर्कस्पेसका एपबाट डेटा पहुँच गर्न अनुमति दिन सक्छन् । यसको उद्देश्य प्रयोगकर्तालाई उनीहरूको आवश्यकता र रुचिअनुसार थप व्यक्तिगत अनुभव उपलब्ध गराउनु हो ।
तर, यस्तो डेटाको प्रयोग सम्बन्धित सेवाको नीति र प्रयोगकर्ताको सेटिङअनुसार हुनेछ । प्रयोगकर्ताको रुचि, गतिविधि वा गुगल सेवाबाट प्राप्त व्यक्तिगत सामाग्रीका आधारमा विज्ञापन देखाउन सकिने व्यवस्था पनि नीतिमा उल्लेख गरिएको छ ।
आफ्नो गोपनीयता सुरक्षित राख्न के गर्ने ?
जीमेल, गुगल ड्राइभ वा गुगल फोटोजको डेटा अन्य गुगल सेवासँग सेयर गर्न चाहनुहुन्न भने आफ्नो गोपनीयता सेटिङ र कनेक्ट गरिएका एपहरूको अनुमति जाँच गर्न आवश्यक छ ।
प्रयोगकर्ताले कुन सेवाले आफ्नो डेटा पहुँच गर्न अनुमति पाएको छ र उक्त पहुँच आवश्यक छ कि छैन भन्ने विषयमा ध्यान दिनुपर्छ । आवश्यक नभएका कनेक्टेड सेवाको अनुमति हटाउन सकिन्छ ।
गुगलको नीतिमा गरिएको यो परिवर्तनले एआईमार्फत व्यक्तिगत अनुभव उपलब्ध गराउने सुविधा र विज्ञापन प्रणालीबीचको सम्बन्धलाई थप महत्त्व दिएको छ । त्यसैले गुगलका विभिन्न सेवा प्रयोग गर्दा डेटा सेयरिङसम्बन्धी अनुमति र गोपनीयता सेटिङबारे सचेत रहनु आवश्यक छ ।
