आईसीटी समाचार
काठमाडौं । लोकप्रिय मेसेजिङ प्लेटफर्म ह्वाट्सएपले प्रयोगकर्ताको दैनिक कामलाई सहज बनाउने उद्देश्यले नयाँ ‘स्मार्ट टेक्स्ट एक्सन’ (Smart Text Actions) फिचर रोलआउट गर्न थालेको छ ।
यस फिचरले च्याटमा आएका सन्देशभित्र रहेका फोन नम्बर, मिति, समय, इमेल ठेगाना र लोकेसन पहिचान गरी त्यससँग सम्बन्धित विभिन्न सर्टकट उपलब्ध गराउनेछ । यससँगै सामान्य कामका लागि पटक–पटक फरक एप खोल्नुपर्ने झन्झट कम हुने अपेक्षा गरिएको छ ।
टेक्स्टको तल देखिनेछ डटेड अन्डरलाइन
WABetaInfo को रिपोर्टअनुसार, ह्वाट्सएपले एन्ड्रोइड र आईओएसका केही प्रयोगकर्ताका लागि यो फिचर उपलब्ध गराउन थालेको छ । यसले च्याटमा पठाइएका वा प्राप्त गरिएका सन्देशमा रहेका आवश्यक विवरण स्वत: पहिचान गर्न सक्छ ।
कुनै सन्देशमा फोन नम्बर, मिति, समय, इमेल ठेगाना वा ठेगाना पहिचान भएमा सम्बन्धित टेक्स्टको तल डटेड अन्डरलाइन देखिन सक्छ । उक्त टेक्स्टमा ट्याप गर्दा त्यससँग सम्बन्धित विकल्पसहितको पपअप मेनु खुल्नेछ ।
मेनुको माथिल्लो भागमा पहिचान गरिएको टेक्स्टसमेत देखाइनेछ, जसले प्रयोगकर्तालाई एपले सही विवरण पहिचान गरेको छ वा छैन भनेर जाँच गर्न सहज बनाउनेछ ।
यो सुविधा व्यक्तिगत तथा ग्रुप च्याट दुवैमा काम गर्नेछ । प्रयोगकर्ताले चाहेको अवस्थामा अन्डरलाइन गरिएको टेक्स्टलाई बेवास्ता गर्दै सामान्य रूपमा च्याट गर्न पनि सक्नेछन् ।
फोन नम्बरदेखि इमेल र ठेगानासम्मका लागि छुट्टाछुट्टै विकल्प
स्मार्ट टेक्स्ट एक्सनमा पहिचान गरिएको विवरणअनुसार फरक–फरक सर्टकट उपलब्ध हुनेछन् । उदाहरणका लागि, फोन नम्बरमा ट्याप गर्दा नम्बर कपी गर्ने, कन्ट्याक्टमा सेभ गर्ने वा सिधै कल गर्ने विकल्प देखिन सक्छन् ।
त्यस्तै, मिति र समय पहिचान भएको अवस्थामा त्यसलाई कपी गर्ने, फोनको क्यालेन्डरमा थप्ने वा ह्वाट्सएपभित्रै नयाँ इभेन्ट सिर्जना गर्ने विकल्प उपलब्ध हुन सक्छन् ।
कुनै ठेगाना पहिचान भएमा त्यसलाई म्याप्स एपमा खोलेर नेभिगेसन सुरु गर्न सकिनेछ । इमेल ठेगानामा ट्याप गर्दा डिफल्ट इमेल एपमार्फत मेल पठाउने वा ठेगाना कपी गर्ने विकल्प देखिनेछन् ।
यीमध्ये केही सुविधा ह्वाट्सएपमा यसअघि पनि उपलब्ध थिए । तर नयाँ फिचरले विभिन्न विकल्पलाई एउटै मेनुमा व्यवस्थित रूपमा प्रस्तुत गर्नेछ ।
सर्टकटबारे प्रयोगकर्तासँग मागिनेछ प्रतिक्रिया
ह्वाट्सएपले स्मार्ट टेक्स्ट एक्सनमार्फत उपलब्ध गराइएका सर्टकटबारे प्रयोगकर्ताको प्रतिक्रिया पनि लिन सक्नेछ । कुनै टेक्स्ट एक्सन प्रयोग गरेपछि उक्त सुझाव उपयोगी थियो वा थिएन भन्ने प्रश्न स्क्रिनमा देखिन सक्छ ।
प्रयोगकर्ताबाट प्राप्त प्रतिक्रियाका आधारमा टेक्स्ट पहिचान गर्ने प्रणाली र त्यसले उपलब्ध गराउने विकल्पलाई थप प्रभावकारी बनाउन कम्पनीलाई सहयोग पुग्ने अपेक्षा गरिएको छ ।
सबै प्रयोगकर्ताले तत्काल नपाउन सक्छन्
हालसम्म ह्वाट्सएपले स्मार्ट टेक्स्ट एक्सन फिचर सार्वजनिक गर्नेबारे आधिकारिक घोषणा गरेको छैन । यसको वितरण चरणबद्ध रूपमा भइरहेको छ । त्यसैले एन्ड्रोइड र आईओएसको पछिल्लो संस्करण प्रयोग गरिरहेका सबै प्रयोगकर्ताले पनि तत्काल यो सुविधा पाउने निश्चित छैन ।
आगामी दिनमा यसको परीक्षण र विस्तारसँगै थप प्रयोगकर्ताका लागि उपलब्ध गराइने अपेक्षा गरिएको छ ।
