खुला विश्वविद्यालयको एक वर्षे बीएड कार्यक्रममा नयाँ भर्ना खुल्यो, यसरी दिनुहोस् अनलाइन आवेदन

नेपाल खुला विश्वविद्यालय, सामाजिक शास्त्र तथा शिक्षा संकायले एक वर्षे बीएड कार्यक्रममा नयाँ भर्ना खुलाएको छ । शैक्षिक वर्ष २०८०/०८१ का लागि सामाजिक शास्त्र तथा शिक्षा संकायले एक वर्षे ( दुई सेमेष्टर) अंग्रेजी, विज्ञान र गणित विषयमा नयाँ भर्ना खुलाएको हो ।

भर्ना आवेदकहरूले विश्वविद्यालयको वेबसाइट www.nou.edu.np मा रहेको स्टुडेन्ट प्यानलमार्फत अनलाइन आवेदन दिन सकिने छ । आवेदन शुल्क १ हजार रूपैयाँ तोकिएको छ ।

उक्त शुल्क नेपाल खुला विश्वविद्यालयको नाममा ग्लोबल आईएमई बैंक लिमिटेड, कीर्तिपुर शाखामा रहेको चल्ती खाता नं. ०५०१०१००००५०२ मा जम्मा गरी सो बैंक भौचर स्क्यान गरी आवेदन साथ अपलोड गर्नुपर्नेछ ।

आवेदकले आवेदन साथ सम्बन्धित शैक्षिक तह र कार्यक्रमका लागि तोकिएको न्यूनतम शैक्षिक योग्यताका प्रमाणपत्र र ट्रान्सक्रिप्टको स्क्यान कपी अपलोड गर्नुपर्नेछ । प्रवेश परीक्षा तथा भर्ना सम्बन्धी अन्य विस्तृत जानकारी सम्बन्धित डीन कार्यालयले निर्धारण गरे अनुसार हुनेछ ।

आवेदकले कम्प्युटरको आधारभूत सिप तथा ज्ञान प्राप्त गरेको हुनुपर्ने समेत बताइएको छ । प्रत्येक कार्यक्रम तथा विषयमा आवेदक विद्यार्थी संख्या २० जना भन्दा कम भएमा विश्वविद्यालय भर्ना गर्न बाध्य हुने छैन । कक्षा सञ्चालन मंसिर तेस्रो हप्ता देखि सञ्चालन हुनेछ ।