आईसीटी समाचार
युरोपियन युनियनले चिनियाँ विद्युतीय सवारीसाधनमा ३८ प्रतिशतसम्म अतिरिक्त कर लगाउने भएको छ । स्थानीय उत्पादकलाई सुरक्षित गर्न युनियनले चिनियाँ विद्युतीय सवारीसाधनमा थप कर लगाउन लागेको हो ।
द न्युयोर्क टाइम्सको एक रिपोर्ट अनुसार युरोपियन युनियनले चिनियाँ कार निर्मातालाई थप कर बारे चेतावनी दिइसकेको छ ।
थप कर उत्पादन कम्पनीहरू अनुसार फरक फरक लाग्ने छ, जुन १० प्रतिशतभन्दा माथि हुनेछ । रिपोर्टका अनुसार बीवाईडी र गिलीका विद्युतीय सवारीमा १७ देखि २० प्रतिशतसम्म थप कर लाग्ने छ ।
यस्तै एसएआईसीलाई थप ३८ प्रतिशत कर लाग्ने छ । अन्य कम्पनीहरूमाथिको कर, सवारीसाधन उत्पादनका लागि चिनियाँ सरकारको अनुदान पाएका छन् कि छैनन् भन्नेमा निर्भर रहने छ । यसका लागि युरोपियन युनियनले अनुसन्धान अगाडि बढाएको छ ।
किनभने चिनियाँ सरकारको अनुदान पाएका कम्पनीले युरोपियन प्रतिस्पर्धीभन्दा कम मूल्यमा सवारीसाधन बिक्री गरिरहेका छन् ।
छानबिनमा सहयोग गर्ने कम्पनीलाई २१ प्रतिशत र छानबिनमा सहयोग नगर्ने कम्पनीलाई ३८ प्रतिशत अतिरिक्त कर लगाइने जनाइएको छ । आगामी जुलाई ४ देखि नयाँ ट्यारिफ लागु हुनेछ ।
