आईसीटी समाचार
स्विस विकास तथा सहकार्य एजेन्सीको सहयोगमा बीड म्यानेजमेन्ट र ट्यान्जेन्ट वेभ्सको सहकार्यमा सुरू भएको एग्री डिजी टेक च्यालेन्ज परियोजना समापन भएको छ ।
नेपालको कृषि क्षेत्रमा डिजिटल नवप्रवर्तनको समुन्नतिका लागि एग्री डिजी टेक च्यालेन्ज परियोजना एक वर्षसम्म सञ्चालन भएको थियो ।
बिहीबार आयोजित कार्यक्रममा स्विस एजेन्सी फर डेभलपमेन्ट एण्ड कोअपरेसनकी डिजिटलीकरण र निजी क्षेत्र संलग्नता राष्ट्रिय कार्यक्रम अधिकारी स्नेहा भट्टराईले नेपालको कृषि क्षेत्रलाई प्रविधिमार्फत आधुनिकीकरण गर्न आवश्यकतामा जोड दिँदै एग्री डिजी टेक च्यालेन्ज दोस्रो चरणको तयारी सुरु भइसकेको घोषणा गरिन् ।
यस्तै ट्याङ्गेन्ट वेभ्सका संस्थापक सुमन शाक्यले एक्सेलेरेसन कार्यक्रम सहभागीहरूले आफ्नो बजार खोज्न र बजार अनुकूल बन्ने प्रक्रियामा सहयोग गर्न बनाइएको जानकारी दिएका थिए ।
नेपालको आर्थिक विकासलाई अघि बढाउन निरन्तर साझेदारी आवश्यक रहेको समेत उनले जोड दिएका थिए ।
यसैगरी बिड म्यानेजमेन्टका संस्थापक सुजिव शाक्यले आगामी वर्ष नेपाल न्यूनतम विकसित देश (LDC) को सूचीबाट उतीर्ण हुने तयारीमा रहेको र यस क्रममा सामूहिक प्रयासको आवश्यकता अझै ठूलो रहेको बताए ।
यस एक्सिलेरेसन कार्यक्रमका लागि एग्रो रेन्ज नेपाल, ई-ग्रो, घाम पावर, इन्फर्मेसन केयर, मुक्तिनाथ आई-टेक, आरभीएम कोल्ड, स्टोरी साइकल र टेक्की छनौट भएका थिए ।
सहभागी कम्पनीहरूलाई एक्सिलेरेसन चरणभर व्यावसायिक तथा प्राविधिक प्रशिक्षण प्रदान गरिएको थियो भने विभिन्न प्राविधिक विज्ञ र क्षेत्रगत विशेषज्ञहरूले प्रशिक्षण प्रदान गरिएको थियो ।
