आईसीटी समाचार
काठमाडौं । व्हाट्सएप आज विश्वकै सबैभन्दा धेरै प्रयोग हुने म्यासेजिङ प्लेटफर्ममध्ये एक हो । यही लोकप्रियताका कारण ह्याकर र स्क्यामरहरूको प्रमुख निशानामा पनि यो पर्ने गरेको छ । यदि व्हाट्सएप अकाउन्ट ह्याक भयो भने अनधिकृत व्यक्तिले सन्देश पठाउन, व्यक्तिगत गोपनीयता भंग गर्न, पहिचानको दुरुपयोग गर्न र केही अवस्थामा आर्थिक ठगीसमेत गर्न सक्छ ।
ह्याक भएको व्हाट्सएप अकाउन्ट कसरी पुन: प्राप्त गर्ने ?
व्हाट्सएप अकाउन्ट ह्याक भएको शंका लागेमा सबैभन्दा पहिले आफ्नो मोबाइलमा व्हाट्सएप पुन: इन्स्टल गरी आफ्नो फोन नम्बर प्रयोग गरेर लगइन गर्नुपर्छ । यसो गर्दा सोही अकाउन्टमा पहुँच बनाएको अनधिकृत प्रयोगकर्ता स्वत: लगआउट हुन्छ ।
लगइनका क्रममा प्राप्त हुने ६ अङ्कको भेरिफिकेशन कोड कुनै पनि व्यक्तिसँग साझा गर्नु हुँदैन । यही कोडको दुरुपयोग गरेर ह्याकरहरूले अकाउन्टमा पहुँच कायम गर्न सक्छन् ।
यदि लगइन गर्दा Two-Step Verification को PIN मागियो भने "Forgot PIN" विकल्प प्रयोग गरी रिकभरी इमेलमार्फत PIN रिसेट गर्न सकिन्छ । यदि रिकभरी इमेल सेट गरिएको छैन भने केही अवस्थामा PIN रिसेट गर्न सात दिनसम्म प्रतीक्षा गर्नुपर्ने हुन सक्छ ।
यदि तपाईंलाई SIM Swap (सिम स्वाप) भएको आशंका छ भने तत्काल आफ्नो मोबाइल सेवा प्रदायकसँग सम्पर्क गरी सिम सुरक्षित गर्न आवश्यक हुन्छ ।
अकाउन्ट पुन: प्राप्त गरेपछि के गर्ने ?
अकाउन्ट पुन: प्राप्त गरेपछि Linked Devices मा गएर कुनै अज्ञात वा शंकास्पद डिभाइस जोडिएको छ कि छैन जाँच गर्नुपर्छ । अपरिचित डिभाइस देखिएमा तुरुन्त हटाउनुपर्छ । साथै, शंकास्पद सम्पर्कहरूलाई ब्लक गर्नुका साथै आफ्ना परिवार, साथीभाइ वा सम्पर्कमा रहेका व्यक्तिहरूलाई अकाउन्ट ह्याक भएको र पुन: सुरक्षित भएको जानकारी दिनु उपयुक्त हुन्छ ।
भविष्यमा अकाउन्ट कसरी सुरक्षित राख्ने ?
सुरक्षाका लागि Two-Step Verification अनिवार्य रूपमा सक्रिय गर्न, फोनमा मालवेयर वा भाइरस स्क्यान गर्न तथा भेरिफिकेशन कोड कसैसँग पनि साझा नगर्न विज्ञहरूले सुझाव दिएका छन् ।
व्हाट्सएपका अनुसार अकाउन्टमा अनधिकृत पहुँच भएपनि प्रयोगकर्ताका च्याटहरू एन्ड-टु-एन्ड इन्क्रिप्सनका कारण सुरक्षित रहन्छन् । यद्यपि, अकाउन्ट ह्याक भएको आशंका लाग्नेबित्तिकै आवश्यक सुरक्षा उपाय अपनाउनु अत्यन्त महत्त्वपूर्ण हुन्छ ।
