आईसीटी समाचार
काठमाडौं । स्मार्टफोन प्रयोगकर्तामाझ फोटो र भिडियो खिच्ने चलन दिनप्रतिदिन बढिरहेको छ । विशेष गरी एप्पलको आइफोनमा उपलब्ध लाइभ फोटो (Live Photo) फिचर प्रयोगकर्तामाझ निकै लोकप्रिय छ । यो सुविधाले फोटो खिच्नुअघि र पछिको केही सेकेन्डको गतिविधि तथा ध्वनिसमेत रेकर्ड गर्ने भएकाले सामान्य तस्वीरभन्दा बढी जीवन्त अनुभव प्रदान गर्छ ।
तर धेरै आइफोन प्रयोगकर्तालाई एउटै कार्यक्रममा खिचिएका धेरै लाइभ फोटोहरूलाई जोडेर एउटै भिडियो बनाउन सकिने सुविधाबारे जानकारी नहुन सक्छ । एप्पलले फोटो एप (Photos App) मै यस्तो सुविधा उपलब्ध गराएको छ । यसका लागि कुनै अतिरिक्त एप डाउनलोड गर्नुपर्ने आवश्यकता पर्दैन ।
केही सामान्य चरण पूरा गरेपछि प्रयोगकर्ताले आफ्ना धेरै लाइभ फोटोहरूलाई सजिलै भिडियोमा रूपान्तरण गर्न सक्छन् । यसका लागि सबैभन्दा पहिले आइफोनको फोटो एप खोल्नुपर्छ । त्यसपछि भिडियो बनाउन चाहेका लाइभ फोटोहरू चयन गर्नुपर्छ ।
एकभन्दा बढी लाइभ फोटो चयन गरेपछि स्क्रिनमा देखिने तीन बिन्दु (⋯) मेनुमा ट्याप गर्नुपर्छ । त्यहाँ रहेको ‘Save as Video’ विकल्प छनोट गरेपछि आइफोनले चयन गरिएका लाइभ फोटोहरूलाई क्रमअनुसार जोडेर एउटा भिडियो तयार पार्छ ।
भिडियो तयार भएपछि उक्त फाइल फोटो एपको भिडियो खण्डमा सुरक्षित हुन्छ । प्रयोगकर्ताले त्यसलाई हेर्न, सम्पादन गर्न वा फेसबुक, इन्स्टाग्राम, टिकटकलगायत सामाजिक सञ्जालमा सजिलै सेयर गर्न सक्छन् ।
यो सुविधा विशेष गरी यात्रा, कार्यक्रम वा विशेष क्षणका धेरै लाइभ फोटोहरूलाई एउटै आकर्षक भिडियोमा बदल्न उपयोगी हुन सक्छ ।
