माइक्रोसफ्टको नयाँ अपडेट : विन्डोज ११ मा सर्च अनुभव फेरिँदै

काठमाडौं । माइक्रोसफ्टले विन्डोज ११ को सर्च बक्स (Windows Search) मा प्रयोगकर्ताको अनुभव सुधार गर्न नयाँ परिवर्तनहरू ल्याउने घोषणा गरेको छ । कम्पनीका अनुसार सर्च प्रणालीमा गरिएका विभिन्न सुधारले फाइल, एप र अन्य सामग्री खोज्ने प्रक्रिया पहिलेभन्दा छिटो, सहज र प्रभावकारी बनाउनेछ ।

हाल यी नयाँ फिचरहरू परीक्षण चरणमा छन् र Windows Insider Program मा सहभागी प्रयोगकर्ताले प्रयोग गर्न सक्नेछन् । परीक्षण सफल भएपछि आगामी अपडेटमार्फत यी सुविधा सबै विन्डोज ११ प्रयोगकर्ताका लागि उपलब्ध गराइने माइक्रोसफ्टले जनाएको छ ।

नयाँ अपडेटपछि सर्च बक्सको होम इन्टरफेस अझ सफा र व्यवस्थित हुनेछ । यसले हालै गरिएका खोजहरू (Recent Searches) सहज रूपमा देखाउनेछ भने खोज परिणाम (Search Results) प्रदर्शन हुने क्षेत्र पनि फराकिलो बनाइनेछ, जसले फाइल तथा एपसम्बन्धी थप विवरण स्पष्ट रूपमा देखाउन मद्दत गर्नेछ ।

वेब सर्च अनुभवलाई पनि सुधार गरिएको छ । अब खोज परिणामको शीर्ष भागमा देखिने प्रायोजित सामाग्री (Sponsored Content) हटाइनेछ । साथै, प्रयोगकर्ताले आफ्नो आवश्यकताअनुसार स्थानीय (Local) नतिजासँगै वेब र माइक्रोसफ्ट स्टोरका नतिजा देखाउने वा लुकाउने विकल्प पनि पाउनेछन् ।

माइक्रोसफ्टका अनुसार यी परिवर्तनले कम्प्युटरभित्र रहेका फाइल, फोल्डर र एपहरू अझ छिटो तथा बढी सटीक रूपमा फेला पार्न सहयोग गर्नेछ । पछिल्लो समय कम्पनीले Copilot लाई व्यापक रूपमा प्रयोगकर्तामाझ स्थापित गर्ने प्रयास गरेपनि अपेक्षित सफलता हासिल गर्न सकेको छैन । त्यसपछि माइक्रोसफ्टले विन्डोज ११ को मुख्य प्रयोगकर्ता अनुभव (User Experience) सुधारमा बढी ध्यान केन्द्रित गरेको छ ।

यसैक्रममा कम्पनीले स्टार्ट मेनुको आकार आफूअनुकूल परिवर्तन गर्न सकिने सुविधा, समस्याग्रस्त ड्राइभरलाई अघिल्लो संस्करणमा फर्काउने (Driver Rollback) विकल्पलगायत दैनिक प्रयोगलाई सहज बनाउने विभिन्न सुधारहरू पनि थप्दै आएको छ ।