आईसीटी समाचार
काठमाडौं । चिप निर्माता कम्पनी क्वालकमले एप्पलसँगको विश्वव्यापी लाइसेन्स सम्झौता नवीकरण गरेको छ । नवीकरण गरिएको सम्झौता सन् २०२७ अप्रिल १ देखि लागू हुनेछ ।
सम्झौताले एप्पलबाट क्वालकमले प्राप्त गर्दै आएको लाइसेन्ससम्बन्धी आम्दानीको स्रोतलाई निरन्तरता दिनेछ । क्वालकम टेक्नोलोजी लाइसेन्सिङका कार्यकारी उपाध्यक्ष तथा महाप्रबन्धक जोन हानले एप्पलसँगको सम्झौता नवीकरण गर्न पाउँदा आफूहरू खुसी रहेको बताएका छन् ।
क्वालकमले जारी गरेको संक्षिप्त विज्ञप्तिमा नयाँ सम्झौता कति अवधिसम्म लागू रहने भन्ने खुलाइएको छैन । यद्यपि, स्मार्टफोन चिपसेटको बिक्रीमा गिरावट आइरहेको समयमा एप्पलसँगको सम्झौता नवीकरण क्वालकमका लागि महत्वपूर्ण मानिएको छ ।
ब्लुमबर्गका अनुसार एप्पल क्वालकमको सबैभन्दा ठूलो ग्राहक हो । क्वालकमको कुल आम्दानीमा एप्पलबाट हुने कारोबारको हिस्सा पाँच भागको एक भागभन्दा बढी रहेको बताइएको छ । दुवै कम्पनीले पछिल्लो समय विश्वव्यापी मेमोरी चिप अभावसँग सम्बन्धित चुनौती समेत सामना गरिरहेका छन् ।
एप्पलले आफ्ना डिभाइसमा आफ्नै इन–हाउस सिलिकन प्रयोग बढाउने प्रयास गरिरहेको छ । आईफोन डुओ र आईफोन १८ प्रोमा एप्पलको कस्टम ‘सी२’ सेलुलर मोडेम प्रयोग गरिएको छ भने आईफोन १८ प्रो म्याक्सको अमेरिकी संस्करणमा क्वालकमको स्न्यापड्रागन ५जी मोडेम प्रयोग गरिएको बताइएको छ ।
क्वालकमको पछिल्लो वित्तीय नतिजाअनुसार कम्पनीको ह्यान्डसेट चिप बिक्री २० प्रतिशतले घटेर ५.१ अर्ब अमेरिकी डलरमा सीमित भएको छ । क्वालकमका प्रमुख कार्यकारी अधिकृत क्रिस्टियानो आमोनले मेमोरी चिपको आपूर्ति अनिश्चित बनेपछि ओरिजिनल इक्विपमेन्ट म्यानुफ्याक्चरर (ओईएम) कम्पनीहरूले अर्डर घटाउँदा विशेष गरी चीनको बजारमा गिरावट आएको बताएका छन् ।
