आईसीटी समाचार
काठमाडौं । ओपनएआईले आफ्नो शक्तिशाली एआई मोडल जीपीटी ५.६ सोलका लागि ‘अल्ट्राफास्ट’ नामक नयाँ मोड सार्वजनिक गरेको छ । कम्पनीका अनुसार यो मोडमार्फत जीपीटी ५.६ सोल सामान्य प्रक्रियाको तुलनामा १४ गुणासम्म छिटो सञ्चालन हुन सक्छ ।
ओपनएआईका अनुसार अल्ट्राफास्ट मोडले प्रति सेकेन्ड ७५० आउटपुट टोकनसम्म उत्पादन गर्न सक्छ । कम्पनीले यसलाई शक्तिशाली एआई मोडललाई रियल टाइम गतिमा सञ्चालन गर्ने दिशामा महत्वपूर्ण प्रगतिको रूपमा प्रस्तुत गरेको छ ।
यसअघि रियल टाइम गतिमा एआई सञ्चालन गर्न प्राय: साना वा विशेष प्रयोजनका मोडल प्रयोग गर्नुपर्ने अवस्था रहेको ओपनएआईको भनाइ छ । तर, अल्ट्राफास्ट मोडले शक्तिशाली मोडलबाटै उच्च गतिमा काम लिन सकिने कम्पनीले जनाएको छ ।
ओपनएआईका अनुसार जीपीटी ५.६ सोलको अल्ट्राफास्ट मोडलाई ग्राहक सेवा तथा सपोर्ट, साइबर सुरक्षा तथा प्राविधिक समस्या समाधान, वित्तीय बजार विश्लेषण र ई-कमर्सलगायत विभिन्न व्यावसायिक क्षेत्रमा प्रयोग गर्न सकिन्छ ।
हाल अल्ट्राफास्ट मोड परीक्षणका रूपमा सीमित ग्राहकका लागि मात्र उपलब्ध गराइएको छ । यो सुविधा चिप निर्माता कम्पनी सेरेब्राससँगको साझेदारीमा सञ्चालन भइरहेको ओपनएआईले जनाएको छ । कम्पनीका अनुसार यसको क्षमता र पूर्वाधार विस्तार हुँदै गएसँगै अल्ट्राफास्ट मोडको पहुँच थप ग्राहकसम्म विस्तार गरिनेछ ।
