आईसीटी समाचार
काठमाडौं । स्वास्थ्य बीमा बोर्डले स्वास्थ्य बीमा कार्यक्रममा आबद्धता, बीमालेख नवीकरण र केवाईसी विवरण अद्यावधिक गर्न सकिने एचआईबी ई-पोर्टल सञ्चालनमा ल्याएको छ । नयाँ व्यवस्थासँगै स्वास्थ्य बीमासम्बन्धी अधिकांश प्रक्रिया अनलाइनबाटै गर्न सकिने भएको छ ।
बोर्डका अनुसार साउन २९ गतेदेखि HIB e-Portal मार्फत स्वास्थ्य बीमाका विभिन्न सेवा लिन सकिनेछ । यसका लागि छुट्टै विद्युतीय प्रणाली विकास गरी सेवा सञ्चालनमा ल्याइएको हो ।
नयाँ प्रणालीलाई ‘विद्युतीय माध्यमबाट स्वास्थ्य बीमामा आबद्धता तथा बीमालेख नवीकरण सम्बन्धी कार्यविधि, २०८३’ अनुसार सञ्चालन गरिएको बोर्डले जनाएको छ । पोर्टललाई राष्ट्रिय परिचयपत्र (एनआईडी) प्रणालीसँग समेत अन्तरआबद्ध गरिएको छ । एनआईडी नभएका परिवारका सदस्यका लागि भने म्यानुअल रूपमा डिजिटल विवरण पेश गर्न सकिने व्यवस्था छ ।
मोबाइलबाटै बीमा नवीकरण र शुल्क भुक्तानी
अब सेवाग्राहीले ईसेवा, खल्ती र कनेक्ट आईपीएस मार्फत स्वास्थ्य बीमाको प्रिमियम भुक्तानी गर्न सक्नेछन् । व्यक्ति स्वयं वा दर्ता सहयोगीमार्फत नयाँ परिवारलाई स्वास्थ्य बीमा कार्यक्रममा आबद्ध गर्न तथा पुरानो बीमालेख नवीकरण गर्न सकिने व्यवस्था गरिएको छ ।
यसअघि नै स्वास्थ्य बीमा गराइसकेका परिवारले परिवारमूलीको स्वास्थ्य बीमा नम्बर प्रयोग गरी पोर्टलमा प्रवेश गरेर केवाईसी विवरण अद्यावधिक तथा बीमालेख नवीकरण गर्न सक्नेछन् ।
कार्यालय वा संगठित क्षेत्रबाट एकैपटक धेरै परिवारको विवरण दर्ता तथा नवीकरण गर्न मिल्ने बल्क इनरोलमेन्ट र बल्क रिन्युअलको सुविधा पनि प्रणालीमा राखिएको बोर्डले जनाएको छ ।
स्वीकृतिपछि डिजिटल स्वास्थ्य बीमा कार्ड
नयाँ प्रणालीमा जिल्ला तथा प्रदेश तहबाट विवरण प्रमाणीकरण र स्वीकृतिको व्यवस्था गरिएको छ । सम्बन्धित निकायबाट स्वीकृति प्राप्त भएपछि डिजिटल स्वास्थ्य बीमा कार्ड जारी हुने बोर्डले जनाएको छ ।
बोर्डका अनुसार अनलाइन प्रणाली सञ्चालनमा आएपछि स्वास्थ्य बीमामा आबद्धता र नवीकरणका लागि कार्यालय धाउनुपर्ने अवस्था कम हुनेछ । यसबाट सेवाग्राहीको समय तथा खर्च बचत हुनुका साथै सेवा प्रवाहमा पारदर्शिता र सहजता बढ्ने अपेक्षा गरिएको छ ।
केवाईसी अद्यावधिक सुविधाले बीमितका पुराना विवरण सच्याउन तथा स्वास्थ्य बीमा कार्यक्रमको तथ्याङ्कलाई थप व्यवस्थित र विश्वसनीय बनाउन सहयोग पुग्ने बोर्डको विश्वास छ ।
स्वास्थ्य बीमा कार्यक्रमलाई क्रमश: पूर्ण रूपमा डिजिटल प्रणालीमा लैजाने सरकारको योजनाअन्तर्गत एचआईबी ई-पोर्टल महत्वपूर्ण कदम भएको बोर्डका प्रवक्ता डा. पवनकुमार साहले बताएका छन् ।
