आईसीटी समाचार
पछिल्लो समय नेपालमा पनि स्टार्टअप कल्चर बढ्दै गएको छ । कुनै पनि स्टार्टअप वा व्यवसायका लागि वेबसाइट महत्त्वपूर्ण हुन्छ । वेबसाइटका लागि होस्टिङ आवश्यक पर्छ । तर होस्टिङ शुल्क महंगो भएका कारण कतिपयलाई आफ्नो व्यवसायको वेबसाइट बनाउन समस्या भइरहेको हुन्छ ।
यी सबै समस्यालाई ध्यानमा राख्दै डियर वाक स्कुलमा कक्षा ११ मा अध्ययन गरिरहेका काठमाडौंका दिक्षान्त पाण्डेले सुरू गरेको स्टार्टअप हो, इपिसेन्टर होस्टिङ ।
इपिसेन्टर होस्टिङ स्टार्टअप र विजनेशलाई मध्यनजर गरेर सुरु गरिएको संस्थापक दिक्षान्त पाण्डेले बताए । ‘साना साना व्यवसायलाई लक्षित गर्दै इपिसेन्टर होस्टिङ सुरू भएको हो,’ उनले भने, ‘यसमा हामीले सस्तोमा गुणस्तरीय सेवा प्रदान गर्ने प्रयास गरेका छौं।’
इपिसेन्टर होस्टिङ सुरू गर्नुमा पाण्डेको पनि आफ्नै कहानी छ । खासमा उनलाई एउटा वेबसाइट चाहिएको थियो, त्यसका लागि होस्टिङ सेवा आवश्यक पर्‍यो । तर होस्टिङ शुल्क महंगो ।
दिक्षान्तलाई लाग्यो, यो समस्या मेरो मात्र होइन, म जस्ता हजारौंको हो । अनि इपिसेन्टर होस्टिङको आईडिया फुर्‍यो । आफु जस्ता धेरैको समस्या समाधान गर्न ४ महिना अगाडि इपिसेन्टर होस्टिङ सुरू गरेको पाण्डे बताउँछन् ।
इपिसेन्टर होस्टिङमा एउटा गज्जबको सुविधा भनेको यसमा एआई प्रविधिलाई एकीकृत गरिएको छ । कुनै समस्या आए तपाईले एडमिनलाई सम्पर्क गरिरहनु पर्दैन् । सो समस्या हल गर्न एआईले सघाउने छ । अहिलेसम्म इपिसेन्टर होस्टिङ १० जनाभन्दा बढीले प्रयोग गरिरहेका छन् ।
