आईसीटी समाचार
काठमाडौं । गुगलले प्रयोगकर्तालाई फोन नम्बरमार्फत आफ्नो खाता प्रमाणित गर्ने सुविधा प्रदान गरेको छ । इमेल ठेगाना बिर्सिएको अवस्थामा लिंक गरिएको फोन नम्बर प्रयोग गरेर पनि खातामा साइन इन गर्न सकिन्छ । तर पुरानो नम्बर निष्क्रिय भएमा वा अर्को व्यक्तिले प्रयोग गर्न थालेमा खाताको सुरक्षा जोखिममा पर्न सक्छ ।
त्यसैले गुगल तथा जीमेल खातासँग हाल प्रयोगमा रहेको फोन नम्बर लिंक राख्नु आवश्यक छ । गुगलले यही नम्बरमा भेरिफिकेशन कोड, पासवर्ड रिसेट लिंक तथा दुई-स्तरीय प्रमाणीकरण (Two-Factor Authentication) सम्बन्धी सूचना पठाउने गर्छ । नम्बरमा पहुँच नभए खाता पुन: प्राप्त गर्न कठिन हुन सक्छ ।
फोन नम्बर परिवर्तन गर्ने तरिका
गुगल वा जीमेल खातासँग लिंक गरिएको फोन नम्बर परिवर्तन गर्न प्रयोगकर्ताले सबैभन्दा पहिले myaccount.google.com मा गएर आफ्नो खातामा साइन इन गर्नुपर्छ ।
जीमेल एप प्रयोग गर्नेहरूले आफ्नो प्रोफाइल फोटोमा ट्याप गरी “Manage your Google Account” विकल्प चयन गर्न सक्छन् ।
त्यसपछि:
- Personal Info मा जानुहोस् ।
- Contact Info अन्तर्गत रहेको Phone विकल्प चयन गर्नुहोस् ।
- फोन नम्बरको छेउमा रहेको Edit (पेन्सिल) आइकन मा ट्याप गर्नुहोस् ।
- सुरक्षा प्रमाणीकरणका लागि पासवर्ड तथा डिभाइस भेरिफाइ गर्नुहोस् ।
- नयाँ फोन नम्बर प्रविष्ट गर्नुहोस् ।
- गुगलले एसएमएसमार्फत पठाएको भेरिफिकेशन कोड प्रविष्ट गरी नम्बर पुष्टि गर्नुहोस् ।
यसपछि नयाँ फोन नम्बर खाता रिकभरी, सुरक्षा प्रमाणीकरण तथा अन्य आवश्यक सूचनाका लागि प्रयोग हुनेछ । सुरक्षा जोखिम कम गर्न पुरानो नम्बर हटाउन पनि सकिन्छ ।
सबै डिभाइसमा प्रक्रिया लगभग समान
गुगलका अनुसार विन्डोज, एन्ड्रोइड र आइफोनमा फोन नम्बर परिवर्तन गर्ने प्रक्रिया लगभग समान छ । यद्यपि नम्बर परिवर्तन गरेपछि सुरक्षा कारणले पासवर्ड परिवर्तन, खाता रिकभरी वा अन्य संवेदनशील कार्यहरूका लागि नयाँ नम्बर पूर्ण रूपमा सक्रिय हुन अधिकतम एक हप्तासम्म लाग्न सक्छ ।
सबै सेवामा स्वतः अपडेट नहुन सक्छ
गुगलले जीमेल वा गुगल खातामा फोन नम्बर परिवर्तन गरेपनि यो परिवर्तन सबै गुगल सेवामा स्वत: लागू नहुने जनाएको छ । उदाहरणका लागि, Google Calendar, Chrome लगायतका केही सेवामा प्रयोगकर्ताले छुट्टै रूपमा फोन नम्बर म्यानुअली अपडेट गर्नुपर्ने हुन सक्छ ।
त्यसैले फोन नम्बर परिवर्तन गरेपछि आफूले प्रयोग गर्ने अन्य गुगल सेवाहरूमा पनि नम्बर अद्यावधिक भएको छ कि छैन भनेर एकपटक जाँच गर्न आवश्यक छ ।
