आईसीटी समाचार
काठमाडौं । यातायात व्यवस्था विभागको केन्द्रीय प्रणालीमा देखिएको प्राविधिक समस्याका कारण देशभरका यातायात कार्यालयबाट प्रदान गरिने अधिकांश सवारी चालक अनुमतिपत्र (लाइसेन्स) सम्बन्धी सेवा प्रभावित भएका छन् ।
विभागका अनुसार, गत शुक्रबारदेखि इलेक्ट्रोनिक ड्राइभिङ लाइसेन्स तथा सवारी अभिलेख प्रणाली (EDLVRS) सञ्चालनमा समस्या देखिएपछि नयाँ लाइसेन्सका लागि आवेदन दर्ता, बायोमेट्रिक विवरण संकलन, राजस्व भुक्तानी, वर्ग थप तथा नवीकरणजस्ता सेवा अस्थायी रूपमा रोकिएका हुन् ।
प्रणाली अवरुद्ध भएपछि विभिन्न यातायात कार्यालयहरूले सूचना जारी गर्दै सेवाग्राहीलाई तत्काल सेवा उपलब्ध गराउन नसकिने जानकारी दिएका छन् । यद्यपि, समस्या समाधान भएर सेवा कहिलेदेखि पूर्ण रूपमा सञ्चालनमा आउने भन्नेबारे विभागले औपचारिक समयसीमा सार्वजनिक गरेको छैन ।
ललितपुरको एकान्तकुनास्थित यातायात व्यवस्था कार्यालयले विभागको केन्द्रीय सर्भरमा आएको खराबीका कारण लाइसेन्स वितरणबाहेक अन्य सबै सेवा अर्को सूचना जारी नभएसम्म स्थगित गरिएको जनाएको छ ।
चितवनस्थित यातायात व्यवस्था कार्यालयले पनि EDLVRS प्रणालीमा आएको प्राविधिक अवरोधका कारण लाइसेन्ससँग सम्बन्धित सम्पूर्ण सेवा अस्थायी रूपमा बन्द गरिएको सूचना प्रकाशित गरेको छ ।
यस्तै, भक्तपुर कार्यालयले विभागबाट प्रणाली मर्मत तथा सुधारको काम भइरहेको जानकारी प्राप्त भएको उल्लेख गर्दै प्रयोगात्मक परीक्षा र लाइसेन्स वितरणलाई निरन्तरता दिइए पनि नयाँ आवेदन, वर्ग थप, नवीकरण तथा राजस्व बुझाउने सेवा हालका लागि रोकिएको जनाएको छ ।
कलङ्कीस्थित कार्यालयले पनि ट्रायल परीक्षा र तयार भइसकेका लाइसेन्स वितरणबाहेकका सेवा स्थगित गरेको छ । साथै, २९ असार २०८३ मा नयाँ लाइसेन्स वा वर्ग थपका लागि ‘भिजिट डेट’ प्राप्त गरेका सेवाग्राहीलाई सेवा पुन: सञ्चालन भएको मितिले १५ दिनभित्र बायोमेट्रिक प्रक्रिया पूरा गर्न आग्रह गरिएको छ ।
