विन्डोज ल्यापटप तथा पीसीमा स्क्रिनसट कसरी लिने ?

काठमाडौं । स्मार्टफोनमा जस्तै विन्डोज ल्यापटप वा पीसीमा पनि स्क्रिनसट लिन विभिन्न विकल्पहरू उपलब्ध छन् । धेरै प्रयोगकर्ताले PrtScn (Print Screen) बटन प्रयोग गरेर पूरा स्क्रिनको स्क्रिनसट लिन्छन् । तर यसरी लिएको स्क्रिनसटमा सम्पूर्ण स्क्रिन कैद हुने भएकाले आवश्यक भाग मात्र प्रयोग गर्न चाहिँ पछि सम्पादन (क्रप) गर्नुपर्ने हुन्छ ।

यदि स्क्रिनको कुनै निश्चित भाग मात्र कैद गर्न चाहनुहुन्छ भने Windows + Shift + S सर्टकट सबैभन्दा उपयोगी विकल्प हो । यसले आवश्यक भाग मात्र चयन गरेर स्क्रिनसट लिन सहज बनाउँछ । यसरी विन्डोजमा पूरा स्क्रिन वा आवश्यक भागको स्क्रिनसट छिटो र सजिलै लिन सकिन्छ ।

PrtScn बटन प्रयोग गरेर स्क्रिनसट कसरी लिने ?
विन्डोज ल्यापटप वा पीसीमा स्क्रिनसट लिन सबैभन्दा सरल उपाय PrtScn (Print Screen) बटन थिच्नु हो । यो बटन सामान्यतया किबोर्डको माथिल्लो पङ्क्तिको दायाँपट्टि Delete बटनको नजिक हुन्छ । PrtScn थिचेपछि सम्पूर्ण स्क्रिनको तस्बिर क्लिपबोर्डमा कपी हुन्छ । त्यसपछि Paint, Microsoft Word वा अन्य कुनै एपमा Ctrl + V थिचेर पेस्ट गरी आवश्यक अनुसार सेभ गर्न सकिन्छ ।

विन्डोज ल्यापटप तथा पीसीमा स्क्रिनसट लिने विभिन्न तरिका
PrtScn (Print Screen) बटन
PrtScn थिच्दा सम्पूर्ण स्क्रिनको स्क्रिनसट क्लिपबोर्डमा कपी हुन्छ । त्यसपछि Paint, Word वा अन्य एपमा Ctrl + V थिचेर पेस्ट गरी आवश्यक अनुसार सेभ गर्न सकिन्छ ।

Windows + PrtScn
Windows + PrtScn बटन एकैसाथ थिच्दा स्क्रिन केही क्षणका लागि धमिलो (Dim) हुन्छ । लिइएको स्क्रिनसट स्वत: Pictures > Screenshots फोल्डरमा सेभ हुन्छ ।

Alt + PrtScn
Alt + PrtScn थिच्दा हाल सक्रिय (Active) रहेको विन्डोको मात्र स्क्रिनसट लिइन्छ । त्यसपछि Ctrl + V प्रयोग गरेर आवश्यक एपमा पेस्ट गरी सेभ गर्न सकिन्छ ।

Windows + Shift + S
Windows + Shift + S थिचेपछि स्क्रिनको माथिल्लो भागमा एउटा सानो टुलबार देखिन्छ । त्यहाँबाट Rectangular Snip, Freeform Snip, Window Snip वा Full-screen Snip मध्ये आवश्यक विकल्प छनोट गर्न सकिन्छ । स्क्रिनसट क्लिपबोर्डमा कपी हुन्छ । त्यसलाई Snipping Tool, Paint वा अन्य एपमा पेस्ट गरेर सम्पादन तथा सेभ गर्न सकिन्छ ।

PrtScn बटनले काम नगरेमा के गर्ने ?
केही ल्यापटपमा PrtScn बटन प्रयोग गर्न Fn बटन पनि सँगै थिच्नुपर्ने हुन्छ । त्यसका लागि यी सर्टकट प्रयोग गर्न सकिन्छ ।
- Fn + PrtScn
- Fn + Windows + PrtScn

यी विधिहरू प्रयोग गरेर विन्डोज ल्यापटप तथा पीसीमा सजिलै स्क्रिनसट लिन सकिन्छ । यदि कुनै सर्टकटले काम नगरेमा Fn बटनसँग सम्बन्धित सर्टकट प्रयोग गर्नुहोस् । आफ्नो आवश्यकता अनुसार उपयुक्त विधि छनोट गरेर पूरा स्क्रिन वा आवश्यक भागको स्क्रिनसट सजिलै लिन सकिन्छ ।