आईसीटी समाचार
काठमाडौं । टेक्स्पायर कलेजले सामुदायिक विद्यालयका विद्यार्थीलाई प्रविधिमूलक शिक्षा, करियर परामर्श र उद्योग क्षेत्रका विज्ञको मार्गदर्शन उपलब्ध गराउने उद्देश्यले ‘कम्युनिटी टेक मेन्टरसिप कार्यक्रम’ सञ्चालनमा ल्याएको छ । कार्यक्रम सञ्चालनका लागि टेक्स्पायर कलेज र कागेश्वरी मनोहरा नगरपालिकाबीच समझदारीपत्र (एमओयू) मा हस्ताक्षरसमेत भएको छ ।
विद्यालय तहको शिक्षालाई आधुनिक प्रविधि र उद्योग क्षेत्रसँग जोड्दै विद्यार्थीमा आवश्यक डिजिटल सीप, आत्मविश्वास तथा भविष्यका अवसरबारे जानकारी अभिवृद्धि गर्ने कार्यक्रमको मुख्य उद्देश्य रहेको कलेजले जनाएको छ ।
स्थानीय सरकार, सामुदायिक विद्यालय र उद्योग क्षेत्रको सहकार्यमा सञ्चालन हुने कार्यक्रमले नेपालभरका सामुदायिक विद्यालयका विद्यार्थीलाई गुणस्तरीय प्रविधिमूलक सिकाइको पहुँच विस्तार गर्ने लक्ष्य राखेको छ । व्यवहारिक सिकाइ, नवप्रवर्तनको प्रवर्द्धन तथा उद्योग क्षेत्रसँग प्रत्यक्ष सम्पर्कमार्फत विद्यार्थीलाई भविष्यका प्रविधिमूलक अवसरका लागि तयार पार्ने उद्देश्य कार्यक्रमले लिएको छ ।
कार्यक्रमअन्तर्गत विद्यार्थीलाई परियोजनामूलक सिकाइ (Project-based Learning), अन्तरक्रियात्मक कार्यशाला, उद्योग विज्ञको मेन्टरसिप, करियर मार्गदर्शन तथा प्रविधि सचेतना कार्यक्रम सञ्चालन गरिनेछ । यस्ता गतिविधिमार्फत विद्यार्थीको समस्या समाधान गर्ने क्षमता, डिजिटल साक्षरता र नवप्रवर्तनशील सोचको विकासमा सहयोग पुग्ने अपेक्षा गरिएको छ ।
कार्यक्रमको औपचारिक सुरुवातसँगै टेक्स्पायर कलेज र कागेश्वरी मनोहरा नगरपालिकाबीच कार्यक्रम सञ्चालनसम्बन्धी समझदारीपत्रमा हस्ताक्षर भएको हो । यो सहकार्यसँगै कागेश्वरी मनोहरा नगरपालिकाले कार्यक्रम कार्यान्वयन गर्ने पहिलो स्थानीय तहका रूपमा सहकार्य गरेको जनाइएको छ ।
सम्झौताअनुसार नगरपालिकाले आफ्नो क्षेत्रभित्रका सामुदायिक विद्यालयसँग आवश्यक समन्वय गरी कार्यक्रम सञ्चालनमा सहजीकरण गर्नेछ । कार्यक्रमको पहिलो चरणमा कागेश्वरी मनोहरा नगरपालिकाभित्र छनोट गरिएका सामुदायिक विद्यालयका विद्यार्थीलाई सहभागी गराइनेछ ।
पहिलो चरणको अनुभव र प्रभावका आधारमा कार्यक्रमलाई आगामी दिनमा अन्य स्थानीय तह तथा सामुदायिक विद्यालयमा समेत विस्तार गर्ने योजना रहेको टेक्स्पायर कलेजले जनाएको छ ।
कार्यक्रमले विद्यालय तहका विद्यार्थीलाई कक्षाकोठाको सैद्धान्तिक ज्ञानसँगै प्रविधिको व्यावहारिक प्रयोग, उद्योग क्षेत्रको कार्यशैली र भविष्यमा उपलब्ध हुन सक्ने करियर अवसरबारे प्रत्यक्ष जानकारी दिने अपेक्षा गरिएको छ ।
