आईसीटी समाचार
काठमाडौं । गुगलको एआई एप जेमिनीका मासिक सक्रिय प्रयोगकर्ताको संख्या १ अर्ब नाघेको छ । गुगलका सीईओ सुन्दर पिचाईले एक्समार्फत जेमिनी गुगलका सबैभन्दा तीव्र गतिमा बढिरहेका उत्पादनमध्ये एक बनेको जानकारी दिएका हुन् ।
जेमिनी १ अर्ब प्रयोगकर्ता पुग्ने गुगलको १४ औँ उत्पादन बनेको छ । जेमिनीको तीव्र वृद्धिसँगै यो ओपनएआईको च्याटजीपीटीसँगको प्रतिस्पर्धामा पनि अघि बढिरहेको छ । च्याटजीपीटीले पनि गत जुनमा १ अर्ब मासिक सक्रिय प्रयोगकर्ता पार गरेको थियो ।
गुगलले आफ्नो एआई जेमिनीलाई सर्च, वर्कस्पेस र एन्ड्रोइडलगायत विभिन्न सेवामा विस्तार गर्दै आएको छ । गुगलका अनुसार जेमिनीको स्ट्यान्डअलोन एपका मासिक सक्रिय प्रयोगकर्ताको संख्या मात्रै १ अर्ब नाघेको हो । गुगलका अन्य सेवामार्फत जेमिनी प्रयोग गर्ने प्रयोगकर्ता भने यो तथ्यांकमा समावेश छैनन् ।
जेमिनी प्रयोगकर्तामध्ये ६३ प्रतिशतले भ्वाइस फिचरमार्फत एआईसँग कुराकानी गर्ने गरेको गुगलले जनाएको छ । जेमिनीले दैनिक १५ करोडभन्दा बढी तस्बिर समेत निर्माण गरिरहेको कम्पनीको दाबी छ ।
जेमिनीको प्रयोग गुगलका आफ्नै उत्पादनमा मात्र सीमित छैन । आईओएसमा पनि जेमिनीका १० करोडभन्दा बढी सक्रिय प्रयोगकर्ता रहेको गुगलले जनाएको छ ।
गुगलले जेमिनीका नयाँ मोडल तथा फिचरहरू निरन्तर सार्वजनिक गर्दै आएको छ । पछिल्लो समय जेमिनी ३.५ फ्ल्यास सार्वजनिक गर्दै कोडिङ तथा स्वचालित एआई एजेन्टसम्बन्धी कामलाई थप प्रभावकारी बनाउने लक्ष्य राखिएको छ ।
गुगलका अनुसार पछिल्लो एक वर्षमा जेमिनीका दैनिक सक्रिय प्रयोगकर्ताको संख्या तीन गुणाले बढेको छ । यसले एआई सेवाको बजारमा जेमिनीको तीव्र विस्तारलाई देखाएको छ ।
