आईसीटी समाचार
काठमाडौं । अमेरिकी प्रविधि कम्पनी एप्पलले आफ्नो एप स्टोरलाई ‘एजेन्टिक एआई’ प्रणालीका लागि खुला गर्न सक्ने संकेत दिएको छ । कम्पनीले आगामी डेभलपर सम्मेलन WWDC मा कृत्रिम बुद्धिमत्ता (एआई) सम्बन्धी महत्वपूर्ण घोषणा गर्ने अपेक्षा गरिएको छ ।
प्रविधिसम्बन्धी वेबसाइट The Information को रिपोर्टअनुसार एप्पल अहिले एआईसँग सम्बन्धित विभिन्न चुनौतीहरूको सामना गरिरहेको छ । विशेष गरी, उपकरणहरूमा एआई प्रणालीलाई सुरक्षित र प्रभावकारी रूपमा कसरी समावेश गर्ने भन्ने विषयमा कम्पनीले अझै काम गरिरहेको बताइएको छ ।
रिपोर्टका अनुसार एप्पलले हालसम्म ‘vibe coding’ प्रकारका उपकरणहरूलाई एप स्टोरमा अनुमति दिएको छैन । यस्ता उपकरणहरूले प्रयोगकर्तालाई एआईमार्फत सिधै नयाँ एप बनाउन सहयोग गर्ने भएकाले कम्पनीको नीतिसँग बाझिन सक्ने र सुरक्षा जोखिम बढाउन सक्ने चिन्ता रहेको जनाइएको छ ।
यस्ता एआई उपकरणहरूले एप स्टोरको आम्दानीमा असर पार्न सक्ने तथा मालवेयर फैलिने जोखिम पनि रहने एप्पलको बुझाइ रहेको उल्लेख गरिएको छ ।
त्यस्तै, एप्पलले ‘एजेन्टिक एआई’ सेवामाथि पनि कडा निगरानी राख्न सक्ने संकेत देखिएको छ । एजेन्टिक एआईले प्रयोगकर्ताको उपकरण तथा एपहरूलाई स्वतः नियन्त्रण गर्न सक्ने भएकाले गोपनीयता र सुरक्षासम्बन्धी चुनौती बढ्न सक्ने बताइएको छ ।
रिपोर्टअनुसार एप्पलले आफ्ना गोपनीयता र सुरक्षा मापदण्डअनुसार नयाँ एआई प्रणाली विकास गरिरहेको छ । यसले एआईका कारण देखिएका अनियन्त्रित व्यवहार जस्तै गल्तीले इमेल मेटिने वा अनावश्यक कार्य स्वत: सञ्चालन हुने समस्या कम गर्ने लक्ष्य राखेको छ ।
एआई प्रविधिको तीव्र विकाससँग तालमेल मिलाउन एप्पललाई चुनौती भइरहेको बताइए पनि कम्पनीले एप स्टोरमाथिको नियन्त्रण कायम राख्दै एआईको बढ्दो प्रयोगबाट लाभ लिन चाहेको रिपोर्टमा उल्लेख गरिएको छ ।
