नेपाल युवा उद्यमी मञ्च (एनवाईईएफ) काठमाडौं च्याप्टरले आयोजना गरेको एनवाईईएफ स्टार्टअप अवार्ड्समा नेपालको आफ्नै म्यापिङ एप गल्ली म्याप्स विजेता बन्न सफल भएको छ । 

शुक्रबार द सोल्टी काठमाडौंमा आयोजना भएको एनवाईईएफ स्टार्टअप अवार्ड्सको फिनाले कार्यक्रममा गल्ली म्याप्स विजेता बन्न सफल भएको हो । 

यस्तै पेटमामा र क्विकफक्स कन्सल्टिङ उपविजेता भएका छन् भने सोसल इन्टरप्राइज अवार्ड, दूरशिक्षा र अडियन्स स्पीक अवार्ड, पेट मामाले जित्न सफल भएका छन् । 

शुक्रबार भएको तेस्रो संस्करणको एनवाईईएफ स्टार्टअप अवार्ड्समा ट्रफीसहित विजेताले ४ लाख, उपविजेताले २ लाख, सोसियल इन्टरप्राइज र अडियन्स स्पीक अवार्ड विजेताले ५० हजार रूपैयाँ नगद पुरस्कार प्राप्त गरेका छन् ।

अवार्डको ग्राण्ड फिनालेमा प्रमुख अतिथिको रूपमा नेपाल सरकारमा मुख्यसचिव डा. वैकुण्ठ अर्याल र विशिष्ट अतिथिको रूपमा नेपाल उद्योग वाणिज्य महासंघका अध्यक्ष चन्द्र ढकालको उपस्थिति थियो । कार्यक्रममा लगानीकर्ता तथा विभिन्न क्षेत्रका युवा उद्यमीहरूको सहभागीता रहेको थियो । 

विगत २ वर्षदेखि एनवाईईएफ काठमाडौंले आयोजना गर्दै आएको स्टार्टअप अवार्ड्समा यस वर्षदेखि एनवाईईएफका सबै च्याप्टर तथा गभर्निङ काउन्सिलको समेत सहकार्य रहेको थियो ।

यस वर्षको स्टार्टअप अवार्ड्समा देशभरबाट १५० आवेदन प्राप्त भएका थियो । प्राप्त आवेदन मध्येबाट उत्कृष्ट २० हुँदै उत्कृष्ट ७ स्टार्टअपसम्म छनौट गरिएको थियो । उत्कृष्ट ७ स्टार्टअपमा गल्ली म्याप्स, पेट मामा, ब्ल्यांकसर, बीबाबो, दूरशिक्षा, क्विकफक्स कन्सल्टिङ र भूमिथान रहेका थिए । 

उत्कृष्ट ७ स्टार्टअपले शुक्रबार नै आफ्नो आइडिया पिच गरेका थिए । सो पिचङका आधारमा ३ स्टार्टअपलाई अवार्ड्स प्रदान गरिएको हो । यसअघि स्टार्टअप अवार्ड्सले उत्कृष्ट २० स्टार्टअपलाई ६ वटा एक्सपर्ट सेसन सञ्चालन गरेको थियो । त्यसपछि उत्कृष्ट २० स्टार्टअपले गरेको पिचिङका आधारमा उत्कृष्ट ७ स्टार्टअप छनौट भएका थिए ।