आईसीटी समाचार
एमभिसा प्रयोगकर्ताले अब फोनपेको क्युआर कोड स्क्यान गरेर पैसा तिर्न सक्ने भएका छन् । त्यसका लागि भिसा र फोनपेको बिहीबार साझेदारी भएको हो ।
यससँगै भिसा नेटवर्कमा आवद्ध भएका विदेशी पर्यटकले फोनपेको क्युआर कोड स्क्यान गरी नेपालमा कारोबार गर्न सक्ने भएका छन् । करिब २ वर्ष भिसासँगको काम पछि आज यो सेवा शुरू गर्न सफल भएको एफवान सफ्ट ग्रुपका अध्यक्ष विश्वास ढकालले बताए ।
फोनपेको क्युआर कोड स्क्यान गर्न भिसा इनेबल भएको मोबाइल बैंकिङ एप वा एमभिसा मोबाइल एप आवश्यक पर्नेछ ।
अहिले बजारमा रहेका फोनपेका क्यूआर स्ट्यान्डले भिसा सपोर्ट नगर्ने फोनपेले जनाएको छ । त्यसका लागि फोनपेले बजारमा वितरण गरेका क्यूआर स्ट्यान्डहरु परिवर्तन गर्दै लैजाने योजना बनाएको छ ।
फोनपेले केही दिनअघि मोबाइल सेवा प्रदायक संस्था खल्ती र प्रभु पेलाई पनि आफ्नो नेटवर्कमा भित्र्याएको थियो ।
