दाङ । राइड सेयरिङ सेवा प्रदायक कम्पनी सेफ राइड प्रा.लि.ले दाङको लमहीमा शाखा कार्यालय स्थापना गरी सेवा सञ्चालनमा ल्याएको छ । कम्पनीले स्थानीयस्तरमा प्रविधिमा आधारित यातायात सेवा विस्तार गर्ने उद्देश्यसहित लमहीबाट आफ्नो सेवा सुरु गरेको हो ।

लमही नगरपालिका ५ मा बुधबार आयोजित कार्यक्रममा त्रिशिद्धेश्वरी राप्ती सेवा यातायात प्रालिका अध्यक्ष सुरेश हमालले शाखा कार्यालय उद्घाटन गर्दै सेवाको शुभारम्भ गरेका हुन् ।

कम्पनीका अनुसार प्रारम्भिक चरणमा बाइक, अटो, कार र एम्बुलेन्स सेवा उपलब्ध गराइनेछ । यसका अतिरिक्त प्याराग्लाइडिङ तथा हट एयर बेलुनसम्बन्धी सेवा पनि आफ्नो प्लेटफर्ममार्फत उपलब्ध गराउने लक्ष्य कम्पनीले राखेको छ ।

नेपाली प्रविधि र उद्यमशीलतालाई प्रोत्साहन गर्दै सर्वसाधारणलाई सहज, सुरक्षित र व्यवस्थित सेवा प्रदान गर्ने उद्देश्यले शाखा विस्तार गरिएको कम्पनीले जनाएको छ ।

प्रविधिको प्रयोगबाट यात्रुलाई आवश्यक सेवा सहज रूपमा उपलब्ध गराउनुका साथै स्थानीय युवाका लागि रोजगारी र स्वरोजगारका अवसर सिर्जना गर्ने अपेक्षा गरिएको छ ।

कम्पनीका सञ्चालन प्रबन्धक नवराज शर्माले स्थानीय आवश्यकतालाई ध्यानमा राखेर सेवा सञ्चालनमा ल्याइएको बताए । प्रविधिको माध्यमबाट यात्रुलाई सहज र सुरक्षित सेवा उपलब्ध गराउनु कम्पनीको मुख्य लक्ष्य रहेको उनको भनाइ छ ।

लमहीबाट सुरु गरिएको सेवालाई क्रमशः लुम्बिनी प्रदेशका विभिन्न स्थान हुँदै देशभर विस्तार गर्ने कम्पनीको योजना छ । कम्पनीको प्रधान कार्यालय काठमाडौंको नागार्जुन नगरपालिका २ वनस्थलीमा रहेको छ ।

लमहीमा शाखा सञ्चालनमा आएसँगै देउखुरी क्षेत्रका नागरिकले पनि राइड सेयरिङ तथा अन्य प्रविधिमा आधारित सेवा उपयोग गर्न सहज हुने अपेक्षा गरिएको छ ।