काठमाडौं । पछिल्लो समय सामाजिक सञ्जाल र म्यासेजिङ प्लेटफर्महरूमा नेपाल टेलिभिजन (NTV) को नाममा नक्कली सूचनाहरु आइरहेका छन् । यस्ता म्यासेजमा प्रयोगकर्ताले कुनै ‘कपीराइट उल्लंघन दस्तावेजीकरण’ शीर्षक भएको PDF फाइल खोल्न अनुरोध गरिएको छ, जुन वास्तवमा एक फिशिङ अट्याक हो ।

फिशिङ आक्रमणको तरिका
उक्त म्यासेजमा देखिएको PDF फाइलको नाम "कपीराइट उल्लंघन दस्तावेजीकरण गर्न फाइल.pdf" रहेको छ र यसमा क्लिक गरेमा प्रयोगकर्ताको सिस्टम वा एकाउन्टमा अनधिकृत पहुँच प्राप्त गर्ने उद्देश्य राखिएको छ । यस किसिमको म्यासेज सात दिनदेखि लगातार धेरै प्रयोगकर्तालाई आइरहेको छ ।

सावधानी अपनाउन अनुरोध
यदि तपाईँलाई पनि यस्तै म्यासेज आएको छ भने:

• उक्त लिंक वा PDF फाइल नखोल्नुहोस् ।
• उक्त म्यासेज तुरुन्तै डिलिट गर्नुहोस् ।

यस्ता म्यासेज प्राप्त भएको खण्डमा CERT-Nepal वा सम्बन्धित साइबर सुरक्षा निकायलाई जानकारी दिनुहोस् ।

नेपाल टेलिभिजनको स्पष्टीकरण
नेपाल टेलिभिजनले यस विषयमा कुनै अधिकारिक सूचना जारी नगरेको र यस्ता म्यासेजमा उल्लेख गरिएको विवरण असत्य र भ्रामक भएको स्पष्ट पारेको छ । NTV को नाम दुरुपयोग गरी गरिएको यस्तो कार्य कानुनी रुपमा दण्डनीय छ ।

फिशिङ अट्याकहरू दिन प्रतिदिन परिष्कृत बन्दै गइरहेका छन् । यसैले कुनै पनि अनजान लिंक वा फाइल खोल्नु अघि सावधानी अपनाउनु आवश्यक छ । साइबर सुरक्षाको लागि व्यक्तिगत सतर्कता सबैभन्दा प्रभावकारी उपाय हो ।