आइसिटी समाचार
साइबर सुरक्षा अनुसन्धानकर्ताहरूले अनलाइनमा २६ अर्ब डेटा लिक भएको पत्ता लगाएका छन् । साइबर न्यूज र सेक्युरिटी डिस्कभरले गरेको अनुसन्धानमा १२ टेराबाइट साइजको २६ बिलियन विवरणसहितको डेटासेट लिक भएको पत्ता लागेको हो ।
यस रेकर्ड्समा यसअघि ब्रिच भएका डेटाहरूको कम्पाइल, रिइन्डेक्स्ड लिक्स, ब्रिच र निजी रूपमा बेचिएका डेटासेट रहेको अनुसन्धानकर्ताले जानकारी दिएका छन् ।
अनुसन्धानकर्ताले भनेका छन्, ‘डेटासेट खतरनाक छ । थ्रेट एक्टरले आईडेन्टिटी थेप्ट, परिष्कृत फिसिङ स्क्रिम, लक्षित साइबर आक्रमण तथा व्यक्तिगत र संवेदनशील खाताहरूमा अनाधिकृत पहुँचसहित आक्रमणका लागि एकत्रित डेटाको लाभ उठाउन सक्छन् ।’
लिक भएको इतिहासकै ठूलो डेटासेटमा भर्खरै चोरी भएका थोरै डेटा रहेको र यसअघि लिक भएका विभिन्न ब्रिचहरू धेरै समावेश भएको अनुसन्धानकर्ताको दावी छ ।
डेटासेटमा टेन्सेन्ट (१.५ अर्ब) , वेइबो, अहिलेको एक्स अर्थात पहिलेको ट्विटर (२८१ मिलियन), वाटप्याड (२७१ मिलियन), लिंक्डइन (२५१ मिलियन), एडोब (१५३ मिलियन), क्यानभा (१४३ मिलियन) लगायतका प्लेटफर्म प्रयोग गर्नेको डेटा रहेको बताइएको छ । यस बाहेक अमेरिकी, ब्राजिल, जर्मनी, ट्रकी लगायत अन्य देशका सरकारी संस्थाका डेटा सेमत त्यसमा रहेका छन् ।
उक्त डेटासेटमा कुन कुन विवरण छन् भनेर कुनै जानकारी आएको छैन् तर पनि युजरनेम र पासवर्ड हुनसक्ने अनुमान लगाइएको छ । यद्यपी यस बाहेक अन्य जानकारी हुने सम्भावना समेत रहेको छ ।
निहित स्वार्थका साथ ठूलो मात्रामा डेटा स्टोर गरिएको अनुसन्धानकर्ताको भनाइ छ । डेटाहरू कम्पाइल गरेर तयार गरिएको यो अहिलेसम्मकै ठूलो डेटाबेस भएको धेरैको अनुमान छ ।
ह्याकरहरूले आक्रमणलाई सहज बनाउन पटक पटक भएका डेटा ब्रिचलाई कम्पाइल गरेर ठूलो मात्रामा डेटा स्टोर गरी राख्ने गरेका छन् ।
