सोमबार, ३० श्रावण, २०७९
Monday, 15 August, 2022

डिजिटल बन्दै संगीत रोयल्टी संकलन समाज, अब सिधै सर्जकको बैंक खातामा रोयल्टी पठाइने

संगीत रोयल्टी संकलन समाज नेपालले सर्जक/श्रष्टाको रोयल्टी अब सिधै बैंक खातामा पठाउने भएको छ । संस्थालाई पारदर्शी र जिम्मेवार बनाउन रोयल्टी संकलन समाजले यस्तो व्यवस्था गर्न लागेको हो । 

सकेसम्म सम्बन्धित श्रष्टाको बैंक खातामै रोयल्टी पठाउने गरी काम गरिरहेको संगीत रोयल्टी संकलन समाज नेपालका महासचिव बी पाण्डेले बताए । 

‘सकेसम्म सम्बन्धित श्रष्टाको अकाउन्टमा सिधै ट्रान्सफर हुने खालको वातावरण बनाउने र डाटाहरू आफुले हेर्न मिल्ने खालेको सफ्टवेयरहरू निर्माण गर्ने कुरामा पनि हामीले काम अगाडि बढाइसकेका छौं,’ पाण्डेले आइसिटी समाचारसँग भने, ‘सायद केही समय पछि यसको नतिजा पनि देखिने छ ।’

सर्जकको बैंक खातामा रोयल्टी पठाउने काम त्यत्ति गार्‍हो र त्यत्ति सजिलो नभएको उनको धारणा छ । यसमा सर्जकले पनि सक्रियता देखाए यो काम छिट्टै हुने रोयल्टी संकलन समाजको विश्वास छ । ढिलोमा अबको १-२ वर्षसम्म सर्जकको बैंक खातामा रोयल्टी पठाउने व्यवस्था हुने संस्थाले उनी बताउँछन् ।

डिजिटल बन्दै समाज

संगीत रोयल्टी संकलन समाज नेपाल नेपालको प्रतिलिपि कानुन अनुसार सन् २००७ मा स्थापना भएको गैरनाफामूलक संस्था हो । सन् २००७ मा स्थापना भएपनि संस्थाको आफ्नै वेबसाइट थिएन् । गत भदौमा मात्रै निर्वाचित भएको नयाँ कार्यसमितिले वेबसाइट सञ्चालनमा ल्याएको थियो ।

संस्थाले यसअघिको राम्रो समय खेर फालेको आभास हुने महासचिव पाण्डे बताउँछन् । नयाँ कार्यसमितिले आफ्नो कामलाई तिब्रताका साथ अगाडि बढाएको छ ।

नयाँ कार्यसमितिले ६-७ महिनाको अवधिमै फेसबुक र इन्स्टाग्राम रिल्समा बज्ने नेपाली गीतको रोयल्टीका लागि मेटासँग सम्झौता गरिसकेको छ भने युट्युब, टिकटक लगायतका डिजिटल प्लेटफर्महरूसँग पनि गर्ने तयारी गरिरहेको छ ।

अहिलेको कार्यसमितिले डिजिटल प्रविधिलाई प्राथमिकतामा राखेर काम गरिरहेको उनले बताए । डिजिटल प्रविधिलाई अगाल्न विभिन्न चुनौती भएपनि त्यसलाई आत्मसात गरेर अगाडि बढ्नेमा उनी कन्फिडेन्स देखिन्छन् । 

संस्थाले वर्क इनफरमेसन डाटाबेस सफ्टवेयर तयार गरेको छ । यसमा सदस्यको डेटाहरू राख्ने काम भइरहेको छ । हाल इन्टरनेसनल स्ट्याण्डर्ड वर्क कोड लिने प्रक्रियामा संस्था रहेको छ ।

त्यस्तै समाजले वर्ल्ड इन्टेलेक्चुअल प्रपटी अर्गनाइजेसनबाट डब्लुआईपीओ कनेक्ट सफ्टवेयर लिन लागिरहेको छ । उक्त सफ्टवेयरलाई अहिले हाम्रो सर्भरमा राख्ने काम भइरहेको पाण्डे बताउँछन् । 

‘अबको केही समयपछि सिस्याक हुँदै नेपाली गीत संगीतको इन्टरनेसनल स्ट्याण्डर्ड कोड जेनेरेट गर्न सक्ने छौं,’ उनले भने, ‘१-२ हप्तापछि हामीले कोड जेनेरेट गर्न शुरू गर्नेछौं ।’

यो पनि पढ्नुहोस्ः युट्युब, टिकटक, स्पोटिफाईमा बज्ने नेपाली गीतले पनि अब रोयल्टी पाउने, सम्झौता गर्ने तयारी

 

 
 

सम्बन्धित समाचार