आइसिटी समाचार
पछिल्लो समय नेपालमा पनि आफैले नयाँ स्टार्टअप शुरू गर्ने युवाहरूको जमात बढ्दै गएको छ । स्टार्टअप शुरू गरेका युवालाई लगानी र मेन्टरशिपको खाँचो छ । यही खाँचोलाई पूरा गर्न लिभिङ विथ आइसिटीले सातै प्रदेशमा स्टार्टअप एण्ड आइडिया फेस्ट आयोजना गरिरहेको छ ।
पहिलो चरणमा ४ वटा प्रदेशमा कार्यक्रम आयोजना भइरहेको छ । गत चैत १८ गते गण्डकी प्रदेशबाट शुरू भएको फेस्ट लुम्बिनी र मधेशमा सम्पन्न भइसकेको छ भने वैशाख ५ गते प्रदेश नम्बर १ मा हुँदैछ ।
बाँकी ३ प्रदेशमा जेठ महिनामा सञ्चालन हुनेछ । त्यसपछि सातै प्रदेशका उत्कृष्ट स्टार्टअपलाई लगानी र मेन्टरशिपको अवसर दिइनेछ । आज हामी तपाईलाई स्टार्टअप एण्ड आइडिया फेस्टमा छनोट भएका गण्डकी प्रदेशका उत्कृष्ट ५ स्टार्टअपको बारेमा जानकारी दिदैछौं ।
सात्विक न्युट्री फुड
सात्विक न्युट्री फुड डेढ वर्ष अगाडि शुरू भएको हो । सात्विक ग्रुप अफ कम्पनी अन्तर्गत सात्विक न्युट्री फुड सञ्चालन भइरहेको छ । सात्विक ग्रुप अफ कम्पनीमा १५ जनाले ४५ लाख लगानी गरेका छन् ।
सात्विक न्युट्री फुडले डाइट प्लान, परामर्श लगायत न्युट्रिसन सम्बन्धि सेवा दिदै आएको छ । कम्पनीले आफ्नै किचेन पनि शुरू गरेको छ, जसमा डाइट प्लान अनुसारको खाना र खाजा तयार गरिन्छ ।
डाइट अनुसारको खाना केही निश्चित ठाउँमा डेलिभर समेत हुन्छ । आफ्नो सेवालाई विस्तार गर्ने कम्पनीको योजना छ । सात्विक न्युट्री फुडमा अहिले ७ जनाले रोजगारी पाएका छन् ।
क्वाड गेम्स
क्वाड गेम्स २ वर्ष अगाडि स्थापना भएको हो । क्वाड गेम १५ देखि २० लाखको लगानीमा पोखराका आशिष ढुंगाना, महेश ढुंगाना, विपिन सुवेदी र अश्विन ढुंगानाले स्थापना गरेका हुन् ।
क्वाड गेम्स अन्तर्गत अहिले कार, सुटिङ र वर्ड बनाउने गेम गरी कुल ८ वटा गेम सार्वजनिक भएका छन् । ८ वटा एप हाल प्लेस्टोरमा उपलब्ध छन् । आईओएसमा पनि उपलब्ध गराउने क्वाड गेम्सको तयारी छ ।
क्वाड गेम्स अन्तर्गत सार्वजनिक भएका गेम प्लेस्टोरबाट ६-७ लाख पटक डाउनलोड भएका छन् । उनीहरूले आवश्यक जनशक्ति फ्रिल्यान्सरबाट गराइरहेका छन् ।
हेल्लो हेल्थ क्लिनिक
हेल्लो हल्थ क्लिनिकले स्वास्थ्य प्रदान गर्दै आएको छ । बि.सं. २०७६ सालमा स्थापना भएको हेल्लो हेल्थ पोलिक्लिनिक प्रालिले हेल्लो हेल्थ क्लिनिक सञ्चालन गरिरहेको छ । पोखराका मदनले १ करोडको लगानीमा हेलो हेल्थ क्लिनिक स्थापना गरेका हुन् ।
हेलो हेल्थ क्लिनिकले क्लिनिक, डेन्टल, ल्याब, फार्मेसी सेवा प्रदान गर्दै आएको छ । हेलो हेल्थ क्लिनिकबाट औषधी घरमै डेलिभरी पनि हुन्छ । हेलो हेल्थ क्लिनिकले पोखरामा स्कुल हेल्थ कार्यक्रम पनि सञ्चालन गरिरहेको छ । यसबाट विद्यार्थीरूलाई प्राथमिक उपचार दिइन्छ ।
यसलाई अझै व्यवस्थित बनाउन स्याटेलाइट क्लिनिक शुरू गर्ने कम्पनीको योजना छ । एप र वेबसाइट ल्याउने कम्पनीले जनाएको छ । हेलो हेल्थ क्लिनिकमा अहिले ८ जनाले रोजगारी पाएका छन् । हालसम्म हेलो हेल्थ क्लिनिकले ५ हजार बढीलाई सेवा प्रदान गरिसकेको छ ।
एक कल होम सोलुसन
सन् २०१७ मा एक कल होम सोलुसन स्थापना भएको छ । पोखराका बिमल वाँस्तोला र पेरिस घिमिरेले स्थापना गरेका हुन् । एक कल होम सोलुसनले इलेक्ट्रिकल, पलम्बिङ, कारपेन्ट्री, इलेक्ट्रोनिक्स, कम्प्युटर सर्भिसेस, ब्युटी, पेन्टिङ, बडी फ्याट एनालाइसिस लगायतका सेवा अनलाइनबाट प्रदान गर्दै आएको छ ।
कम्पनीले हार्डवेयर र इलेक्ट्रिकल सामानको भौतिक स्टोर पनि राखेको छ । एक कल होम सोलुसनलाई मास स्केलमा लैजाने कम्पनीको योजना छ । कम्पनीमा अहिले १० जना आवद्ध भएका छन् ।
एक्सडिजो टेक्नोलोजीज
एक्सडिजो टेक्नोलोजीज प्रालि २ वर्ष अगाडि स्थापना भएको आईटी कम्पनी हो । पोखराका दिनेश थापा एक्सडिजो टेक्नोलोजीजका संस्थापक हुन् । कम्पनीले डिजाइन, डिजिटल मार्केटिङ, रिसर्च तथा डेभलपमेन्ट, कन्सल्टिङ, ट्रेनिङ लगायतका सेवा प्रदान गर्दै आएको छ ।
कम्पनीले अब आफ्नै प्रडक्ट विकासमा ध्यान दिने योजना बनाएको छ । एक्सडिजोले अहिलेसम्म ५०० बढीलाई ग्राहकलाई सेवा प्रदान गरिसकेको छ । कम्पनीमा हाल १५ जनाले रोजगारी पाएका छन् ।
