आईसीटी समाचार
सञ्चार तथा सूचना प्रविधि मन्त्री ज्ञानेन्द्र बहादुर कार्कीले सञ्चार तथा सूचना प्रविधिको प्रयोग, विकास र विस्तारबिना समग्र देश विकासको परिकल्पनासम्म कठिन रहेको बताएका छन् ।
राष्ट्रिय सूचना तथा सञ्चार प्रविधि दिवसको अवसरमा शुभकामना दिदै मन्त्री कार्कीले सूचना प्रविधिको प्रयोगबिना देश विकास कठिन रहेको बताएका हुन् ।
आजको युग सञ्चार तथा सूचना प्रविधिको भएको र यो आजको आवश्यकता मात्र नभएर अपरिहार्यता भएको कार्कीको भनाइ छ ।
‘यसको प्रयोगले समस्त विश्वलाई नै एउटा गाउँका रूपमा परिणत गरिदिएको छ,’ उनले शुभकामना सन्देशमा भनेका छन्, ‘मानव जीवनलाई सहज, सरल र सम्वृद्ध बनाउनका लागि सञ्चार तथा सूचना प्रविधिले महत्वपूर्ण भूमिका खेलेको छ ।’
मन्त्री कार्कीका अनुसार सरकारले व्यवस्थित तथा सुरक्षित साइबर स्पेश निर्माणका लागि साइबर सुरक्षा नीति निर्माणको कार्य अगाडि बढाएको छ ।
सञ्चार तथा सूचना प्रविधिलाई व्यवस्थित गर्न सरकारले नीतिगत, कानुनी, संरचनागत तथा प्रक्रिया निर्माण, परिमार्जन र सुधारका कार्यहरू उच्च प्राथमिकताका साथ अगाडि बढाएको उनले बताए ।
त्यस्तै संवेदनशील पूर्वाधारलाई चौबीसै घण्टा निगरानी गर्ने गरी पूर्वाधार र जनशक्ति व्यवस्थापन गरिएको छ । सञ्चालनमा रहेका डेटा सेन्टर तथा सरकारी क्लाउडको मूल्यांकन तथा पुनरावलोकन गर्नुका साथै थप डेटा सेन्टर स्थापनाको कार्य अगाडि बढाएको उनको भनाइ छ ।
उनका अनुसार कागजरहित सरकारको अवधारणाबमोजिम विद्युतीय हस्ताक्षरसहितको सरकारी एकीकृत कार्यालय व्यवस्थापन प्रणाली ल्याइएको छ ।
दूरसञ्चार सेवालाई गुणस्तरीय तथा विश्वसनीय बनाउन फाइभजीको प्रयोग अगाडि बढाइएको र सञ्चार तथा सूचना प्रविधिसँग सम्बन्धित नीति तथा कानुन समयसापेक्ष निर्माण तथा परिमार्जनका काम भइरहेको कार्कीले बताए ।
