आईसीटी समाचार
नेपाल टेलिकम पायोनियर आइसिटी अवार्ड २०२२ विजय कृष्ण श्रेष्ठले पाएका छन् । शुक्रबार द सोल्टी काठमाडौंमा आयोजना भएको इन्फोडेभलपर्स आइसिटी अवार्डको ग्राण्ड फिनाले कार्यक्रममा उनलाई पायोनियर आइसिटी अवार्ड २०२२ प्रदान गरिएको हो ।
नेपालको सूचना प्रविधि क्षेत्रमा उल्लेख्य लामो योगदान पुर्याएका व्यक्तिलाई यो अवार्ड प्रदान गरिन्छ । यस वर्ष उक्त अवार्ड विजय कृष्ण श्रेष्ठले पाएका हुन् ।
नेपालको सूचना तथा सञ्चार प्रविधिको क्षेत्रमा लामो योगदान दिएका व्यक्ति हुन, विजय कृष्ण श्रेष्ठ । ‘आइसिटी भेट्रान’को उपनामले समेत परिचित श्रेष्ठले इलेक्ट्रोनिक्स उत्पादन कम्पनी बेल्ट्रोनिक्स कम्प्युटर एन्ड इलेक्ट्रोनिक्स इन्जिनियर्स स्थापना गरेका थिए ।
एमबीएसम्मको अध्ययन पुरा गरेका उनी क्यान महासंघका पूर्व अध्यक्ष समेत हुन् । देश तथा विदेशका विभिन्न कम्पनीमा काम गरेका विजय नेपाल इलेक्ट्रिक भेहिकल इन्डष्ट्रीका अध्यक्ष पनि हुन् ।
विभिन्न कम्पनीमा प्रोमोटर तथा निर्देशक रहेका श्रेष्ठसँग हाइड्रोपावर, बैंकिङ, इन्स्योरेन्स, कम्प्युटर, इलेक्ट्रोनिक क्षेत्रमा काम गरेको ३९ वर्षको लामो अनुभव रहेको छ ।
