आईसीटी समाचार
नेपाल दूरसञ्चार प्राधिकरणले १०० वटा ग्रामीण भेगका विद्यालयलाई स्मार्ट टिभी, सीसी क्यामेरा र ल्यापटप दिने भएको छ ।
बुधबार अन्तर्राष्ट्रिय नारी दिवसको अवसरमा सूचना प्रविधिमा महिला संस्थाले आयोजना गरेको एक कार्यक्रममा बोल्दै दूरसञ्चार प्राधिकरणका अध्यक्ष पुरूषोत्तम खनालले यस्तो जानकारी दिएका हुन् ।
ग्रामीण भेगका विद्यालयलाई गुणस्तरीय शिक्षासँग जोड्न प्राधिकरणले स्मार्ट डिभाइस दिन लागेको खनालले बताए ।
यसका लागि प्राधिकरणले काठमाडौंको एउटा उत्कृष्ट सरकारी स्कुल छनौट गरेर स्टुडियो तयार पार्नेछ ।
त्यसपछि उक्त स्टुडियोबाट ८,९ र १० कक्षाका अंग्रेजी, गणित र विज्ञान विषय पढाइने छ । स्टुडियोमा पढाइने उक्त विषय अनलाइनबाट प्रसारण हुनेछन् । सो अनलाइन प्रसारणको पहुँच गाउँगाउँसम्म पुर्याउन प्राधिकरणले १०० विद्यालयलाई स्मार्ट डिभाइस दिने योजना अगाडि सारेको हो ।
नेपालको शिक्षा क्षेत्रमा यो एउटा कोसेढुंगा सावित हुने उनको भनाइ छ । त्यस बाहेक स्मार्ट डिभाइस हुने विद्यालयहरू पनि उक्त अनलाइन क्लासमा सहभागी हुन सक्ने खनाल बताउँछन् ।
साथै स्टुडियोबाट प्रसारण भएको कक्षाको डेटा व्यवस्थापन गरेर जुनसुकै समयमा अध्ययन गर्ने अवस्थामा समेत बनाइने खनालले जानकारी दिए ।
